Ka Meghalaya High Court ynnin ka sngi da kyntait wei ym bien ko wow pdiang yow lai chakhmat yaka mukotduma wa da yaleh da u MLA ka VPP na North Shillong, u Adelbert Nongrum kawa da yaleh u pyrchah ya u Speaker ka Meghalaya Assembly, u Thomas A Sangma neidaw wym chah u wow wanrah u yaka Special Motion yow yaklam hajrong ka CAG Report ha kani ka dorbar mang tangka kawa dang dep pynman ha uni u snem.
Hawa pynmih yaka hukum da u Justice HS Thangkhiew, da ong wa i wym pdiang u Speaker yaka Special Motion wa da wanrah ym mut wa man ko pyrchah aiñ næ pyrchah yaka riti synchaar hanla man ka phang kawa emkaam bha u yaklam wei ka yung bichaar ym chah yaka wow e ko yei rai yong ka neidaw wa da em ka Article 212 ka Constitution kamtæ da hap wow kyntait wei ym ye u pdiang yaka mukotduma.
Ka yung bichaar da ong ko wa ka Article 122(2) da klam che ko wa i rai yong u Speaker toh iwa khaddooh yow pynlai ryntih yaka dorbar wei hap u ngait da waroh ki dkhot ka yung wei lada pynkut u yaka dorbar wei hadien da rai wow pteiñ biang ym ye wow ong toh wa da leh bakla ya ki kyndon.
Chooh chooh ka yung bichaar ym ye ko wow tuklar yei rukom pynlai yaka yung dorbar wei ini man ko leh hajrong ka yurim wa i hok yong kawon kawon ka yung dorbar chna aiñ wow yada ya idæ nei chah taan hakhmat ka yung bichaar ka aiñ.
Discussion about this post