Ka Bobina Dhar kawa man ka President ka Seng Longkmie Lum Marboh, Nongrah da ong ko wa em ki bru wa yoo ya u Kenedy Khongsit uwa chah kem dang ini wa dep wa emkti wow pynyap ya u khynnah wa dang 7 snem uwa tip kam u Kyrshanbor Kharmudai, wa lailang wei ya dih cha u wa ka Eilang Phawa, heiwa yei metyap ko da chem ynne ka sngi na wah Lapalang wa em marjan ka chnong Nongrah wa Rynjah.
Hawa klam wa kiwa thoh khubor ynne ka sngi, ka Bobina da ong ko wa hanla ym tip yeini, tangwa ye wow pynsakhiat du da ki CCTV Camera kiwa em ha katai ka thaaiñ.
Da khana wa ki pulit da chim ki ya iwa riñ ka CCTV ha ka 4 tarik yow bichaar bniah hajrong ini wa jia neibhah wym toh de ka thaw wa haap hapoh Nongrah.
Da ong ko leh wa ynne i step da pyntip da kawi ka manyung wa rap yoo phær ya kawi ka churia neibhah wa boon ki phare, kamtæ da pyntip wut-wut cha u waheh chnong, waheh dong wa cha ki pulit kiwa da wan wei da chem toh wa em i metyap bru hapoh churia.
Kam wow kdaw heini, neiliang ki pulit da ong ki wa da tipmit ki ya u bru wa suba pynyap ya ka Eilang Phawa kawa da wiar nadooh ka 20 tarik u March nei thaw sah ko ha Nongthymmai Shillong heiwa i chnong tre ko toh na West Jaiñtia Hills District.
Ya u Kenedy won da kem ki pulit ha ka 1 tarik uni u bnai.
Discussion about this post