Shillong: U Acting Syiem ka Hima Mylliem u Pa’iem Ainam Manik Syiem da ong u wa kiwa kitkaam ki seiñbhalang toh u kynjoh ktien chwa ki na ka Hima hawa pynmih ki kawon kawon ka khubor pyrchah ya ka Hima khnang wow lait u yah bakla ya ki khon ka Hima.
Heiyatoh wa i pynbaad wa dai lilaam u Syiem ka Hima Mylliem wa ka Raid Marwet, u Pa’iem Ainam da ong u wa kam ka Hima ymye ko wow pdiang ya kam ini i pynbaad neibhah wa yah ko chawa lait.
U Syiem da pyntip u wa em i kyrpaad na u tre thaw hadien wa da yoh NOC u na ki chnong wa marjan wow dai ya i thaw cha ki BSF, da paan u ya ka NOC na u Syiem ka Raid Marwet, uwa da phah won ya oo wow yoh i mynjur na ka Hima, da pynrap u wa hadien wa da pdiang ya ka chithi da chong ya ka yalang yong ka Executive dorbar ka Hima wei da phah ya ini cha ka Executive Committee ka KHADC wow bichaar bniah tangwa hadooh ynne ka sngi ym em yoh ya ka jubab.
U Pa’iem Ainam da ong u wa ini man i iyi iyi iwa phylla wow pynbaad ya u khlieh synchaar wa ya ka dorbar waroh kawi, wei man ko kawa sñiawsih wa kawa yah bakla khamtam ya ki khon ki hajar yong ka Hima.
Da ong u leh wa ka Hima ym em thaw ko, tangwa du i thaw ka Raid wa ki bru samen, kamtæ ka Hima da kyrpaad ko ya u Donald V Thabah, yong ka KSU wa chwa wow pynbaad yeiyi yeiyi pyrchah ya ka Hima toh u paan pynche u na ka yung krehkaam ka Hima.
Chooh chooh ka Hima Mylliem da ong u wa ym tipmit ko ya utæ u bru namo u agent dai thaw uwa na ka jait Law wei i paan NOC ya kani ka thaw da wan bait ko du na uwi u bru ym na ka raid næ ka chnong.
Also Read: Pyrchah ka KSU yei thmu wow dai ya i thaw wa 1000 Hectare cha ki BSF
Discussion about this post