Ka Hill State People’s Democratic Party (HSPDP) da kyntait ko wow dam noh u kyrchaan ya ka sorkar Meghalaya Democratic Alliance (MDA) lada ym ye ko wow pynyoh ya ka Inner Line Permit (ILP) ha ka jylla.
Hawa klam hadien ka yalang yong ka Central Executive Committee ynne ka sngi, u President ka HSPDP, u K Phlastingwell Pangniang da ong u wa ka HSPDP ym em booh kyndon ko hawa ka lai ko wow kyrchaan ya ka sorkar synrop MDA wa yahkhmat da ka NPP, wei ha i jooh i por da pynsñiaw u yei sñiawngooh ya ka sorkar MDA kawa da wanrah ya ka Resolution wow pynkrehkaam ya ka ILP ha ka jylla Meghalaya, kawa toh kawi na ki phang wa ka Party da booh ko ha ka Election Manifesto 2018. Da ong u wa neibynta wow yoh ya ka ILP na ka sorkar pyrdi ka Party ka chaniah ko yei yahkhmat yong u Montri Rangbah ka jylla.
Da ong u leh wa kani ka sorkar wa katni ka da chimkhia ko leh wow yoh pynpsiah ya ka ktien Khasi ha ka 8th Schedule yong ka riti synchaar ka ri India.
Hawa yatoh wa i pynbait ya u pood u ang, u Pangniang da ong u wa ka HSPDP da lai ko ar sien ha ka sorkar wow kyntu neibynta wow chna ya ki laad ki luti wow pynkut ya i kajia pood wa ka Assam, da pyntip u leh wa neiliang ka Party da e yumut ko ya ka sorkar wow chna ya ka Committee deiwa kynthp ya waroh kiwa synchaar chnong, ki seiñbhalang, ki seiñ saiñpyrthai wa kiwa mihkhmat wow chim ya ka rai wa bha tam. Ha i jooh i por uwa yahkhmat ka HSPDP da kyntu u ya ki paidbah ha khappood wow rai ki du kawi ka sur itæ wow em bait du ha Meghalaya.
Ha kawi won ka liang u Pangniang da ong u leh wa ka HSPDP daw booddien ko neibynta iwa emkaam wow pynkylla (Amend) ya ka Para 12A (b) yong ka Sixth Schedule, khnang wa ya i bor yong u President toh u e noh ha u Governor, khnang wa ka sorkar u ye ko wow yada ya idæ, i chna daka hi ki aiñ wei kamjooh wym pdiang ya ki aiñ ka sorkar pyrdi ki wym yahap hapoh ka jylla.