Kyntait ka NPP wa thmu wow taan ya u Lapang deiwa thung ya oo ka kam u Chief Adviser

Shillong: U State President ka National Peoples’ Party (NPP), u Dr. WR Kharlukhi da ong u wa hadooh katni ympu em iwon iwon i yaklam hajrong wow khut ya uwa yahkhmat warim ka Congress, u Dr. DD Lapang wow psiah u cha ka NPP hanlada ka sorkar Meghalaya Democratic Alliance (MDA) da thung ko ya oo (Dr. DD Lapang) kam uwa e buit wa khroi (Chief Adviser) ya ka sorkar.

Uwa yahkhmat ka NPP da ong u ya ini hawa jubab yeiwa kylli kiwa pathai khubor hajrong i pynbaad u Working President ka Congress, u Vincent H Pala wa i thung ya u Dr. DD Lapang kam uwa e buit ka sorkar toh wow riñ ya oo chapoh ka NPP.

“Kamwa da yaklam nachwa, katni leh nga ong biang O wa ya i jooh wa ya u Lapang da e ya kani ka kyrdan kreh kam ka dak wow burom ya i chakri yong oo da ki phaw snem,” ong u Dr. Kharlukhi.

Da ong u wa uwa yahkhmat ka Congress ye u klam katwa sñiaw u khamtam wa u Lapang da mih u na ka Congress, wei ye u em ki yong oo hi i pyrkhat wow klam hadien.

Related posts

Ya ka Election cha GHADC daw pynbna hadien ka Delimitation

April 15, 2026

Baam smai u Samrat Choudhary kam u CM wa thymme ka Bihar

April 15, 2026

U Kharlukhi da ong u wa ka kyrdan yong u Lapang ha ka jylla ym toh kawa khian wa nai wei i e ka sorkar ya oo ya kani ka kyrdan man ko kam ka dak wow burom ya oo neibhah da man u u rangbah ha ka saiñ pyrthai ha ka jylla.

“Ka sorkar da thung ko ya u Lapang kam u bru wa da chemphang uwa biang ki buit ki budia wow pachat cha ka sorkar,” ong u Dr. Kharlukhi.