Shillong : Ki dkhot ka liang pyrchah ynne ka sngi da dawa ki na ka sorkar wow pynkylla ya i rukom thung kreh yong ka ha ki tnat sorkar deiwa elaad ya ki khynroo khyllood kiwa na ka thaiñ heipor wa thung kreh heiwon iwon i bynta ka sorkar.
Hawa wanrah yeini ha yung dorbar u MLA ka Sohra u T.W. Chyne da ong u wa heipor wa ka sorkar booh ko ya ka yung krehkaam ha ki thaw palatchnong emkaam wow thung kreh da kiwa na ka thaiñ khamtam ha ka Grade IV wa Grade III wei yeini emkaam u leh khlem chim ya ka personal interview kamwa da rai ka sorkar pyrdi.
Ya ini da kyrchaan leh u da u yahkhmat yong ka liang pyrshah u Dr. Donkupar Roy heiwa da e nongmuna u ya ki khynroo khyllood kiwa rah placard rah lama yong wow dawa wa emkaam u yoh kreh du kiwa na kani ka thaiñ hadien wa wai ya ka yungkrehkaam (C&RD Block) ha Bhoirymbong.
Katwa u Paul Lyngdoh da ong u wa i elaad ya ki khynroo khyllood na ka thaiñ rap ye ki u pynyatoh wow sñiawthooh ya ki tre chnong.
Da ong chooh chooh u wa i thung ya ki dkhot ka District Selection Committee da ki heh ki haaiñ pynsihdur ko yei rukom thungkreh neibhah wanrah ko yei baam-tooh wei i yamyntoi para wa tipmit.
Hei yatoh wa ini u Montri Rangbah u Dr. Mukul Sangma da ong u wa ka sorkar daw pait ko wa neini ym thung de ya ki bru yong ki heh ki haaiñ wow man dkhot yong ka DSC næ MPSC khnang wow wanrah yei khooid heipor wa thungkreh.
U Mukul da kyntait u wow bood ya ka hukum ka sorkar pyrdi wow pyndam ya ka Personal Interview heipor wa thung kreh ha ki kaam Grade IV wa Grade III tangwa da pynkylla hi-eh yei rukom e marks.
Da pyntip u leh wa hadien wa yoh ya ka hukum wow pyndam ya ka Personal Interview neiliang ka sorkar jylla da phah chithi ko cha ka sorkar pyrdi wa ong wa lada pynkylla yei rukom e marks ha ka interview daw lait u suba næ mutdur wa da thungkreh deiwa yachah chilliang.
Discussion about this post