Jowai: Ka sorkar pyrdi da pynche ko wa ym em chim ko ya kawon kawon ka rai wow phah pynemkaam yaka Three-Language Policy kawa ong wa ki jylla kiwa ym em klam Hindi wow sdang ki yaka Subject Hindi haka thaw puræ ka wow man kam ka ‘Compulsory Subject’.
Ya ini da pyrchah ki jylla na South India kam ka Tamil Nadu kawa kyntait yeini wei u bood bait ki ya iwa jooh leh ki, kitæ ka ktien Tamil wa English ha ki thaw puræ.
Ini waroh toh iwa mih naka Draft New Education Policy kawa pynkhreh da ki bru wa chemphang wa khlieh da u Scientist ka ri u K. Kasturirangan.
Ka sorkar hawa pynche ko neiliang ka Human Resource Development (HRD) Ministry da ong ko wa kani ka Draft Policy kawa wanrah daka Committee toh kawa da booh hakhmat ki paidbah yow bichaar ki ka wei wow pynsñiaw heiwon biang wei heiwon tlot ko. Wei yaka rai wa khaddooh daw chim du hadien wa pyndep yaka phyllu yumut ka sorkar wei wow chim leh ya iwa tyrwa da ki paidbah.
U Union HRD Minister, u Ramesh Pokhriyal Nishank da pynche u leh wa kani toh du ka tyrwa donhi ym toh ka Policy wa da pynkrehkaam ka sorkar. Chooh chooh da ong u wa u Prime Minister da dep ong u wa ym pynbor ya kawon kawon ka jait ktien ha kawon kawon ka thaw.
U Nishank da ong u wa kani ka Draft man ko du ka Draft donhi kawa dang pynmiat dang pynbha deiwa chim yaka yutip na waroh ki jylla wei daw chong pyrkhat sani bha.
Neiliang u Information and Broadcasting Minister u Prakash Javadekar won da ong u wa ka sorkar u Modi da pyrchang ko wow pynku ya waroh ki jait ktien wei ym em i thmu wow pynbor ya kawon kawon ka jait ktien ha kiwon kiwon.
Kani ka Draft New Education Policy toh kawa pynmih ha kani ka tayaw wa da dep.
Discussion about this post