Ka Voice of the People Party (VPP) da pynche ko yei mih i pyrchah na ki kattu katni hadien wa da pynsñiaw ko ha ka sorkar MDA-II yow pait wei bichaar deiwi ya ka Reservation Policy wei wow dawa pynsangeh chwa yei pynkrehkaam ya ka Roster System kat wym pu dep u leh yeini.
Ka VPP da ong ko wa ka Reservation Policy toh kawa ktah bha yei sñiaw ki paidbah, tangwa ini ymtoh wow khanglaad u chong pyrkhat ya ka neibhah ymem man salonsar i rukom krehkaam ko khlem da pait yei boon bru, i hok ki bru wa em i duna hei doh i pran wa kiwi de wei i pynkrehkaam ya ka Roster System khlem da pait chwa ya ka Reservation Policy da ktah ko ya ki khynroo khyllood kawi na ki jaitbru kawa da hap wow kit ya kani ka lyngkor.
Ka VPP da kyntait ko leh wa u President yong ka, u Ardent Miller Basaiawmoit kamjooh ka Party toh kiwa wanrah yei sñiaw yaphær jaitbru hapoh ka jylla neibhah u Ardent toh u bru wa da heh da san uwa da e yei klam iwa em i kitkhlieh hapoh ka yung dorbar chna aiñ ini wadep heiyatoh waka Reservation Policy waka Roster System. Wei da klam che u leh wym em kwah u wow pyndooh yei hok yong kiwon kiwon wei waroh toh u yoh ki yei jooh i hok.
Chooh chooh da ong wa ya ka VPP da seiñ da ki yurim wa em i mynsien maya, i krehkaam deiwa khooid neibynta ki bru ka jylla kawa man leh ka Party wym neh chah ya ki kaam baam tooh, i leh chilliang, i leh embor da kiwa em hei bor hawa thung kreh ha kiwon kiwon ki thaw.
Kamtæ ka Party da kyrpaad ko ya kiwa chong chnong ka jylla wym toh u chah yahbakla ha kiwa thmu wow pynsih yei pyrtuid ka Party kam kawa leh chilliang wei kawa pait du ya kawi donhi ka jaitbru neibhah kini ki bru da kwah ki wow pynsangeh ya ka la-ær ka Party neidaw wa kitu kiwa baam tooh kiwa leh ya ki kaam thok ym kwah ki wow em bor ka Party.
Ka VPP da khut ko leh ya waroh ki lok na ri-loom Garo wow ya ksohkti ki wa ka VPP yow pynman ya ka All Meghalaya Party yow wanrah yei roi i paar yow wailaad da kiwi ki luti ha ki kaam synchaar khadar hapoh ka jylla.
Hajrong ini da ong wa ka VPP toh du ka donhi ka mynried wa hok ya ka Meghalaya deiwa ong leh wa kiwa yahkhmat yong kiwi ki Party kiwa da yoh yei kyrchaan na ri-loom Garo ym em leh ki iyi iyi leh yow wanrah yei roi i paar wei kini ki Party daw pyrchah bait ki ya iwon iwon i chong pyrkhat yow pynbha pynmiat ya ka Reservation Policy neibhah ym em chimkhia ki wow wanrah yei roi i paar ha ka thaaiñ khamtam ha ka puræ puthi wei i wym chimkhia ya ka puræ puthi toh i leh pyrchah yei kaamram kam kiwa synchaar ya kiwon kiwon ki bru ka imlang sahlang. Neibhah ini da pyndooh ko yei mynsien wow kreh chitom wow yakhun yow poi chakhmat.
Kamtæ ka VPP da ong ko wa ka toh kawa kreh chitom wow pynkupbor ya ki khynroo khlem da pait ya kiwon kiwon ki jaitbru yow man ki kiwa ye u yakhun yaleh ha kawon kawon ka kyrdan hapoh ka ri.
