Shillong: Ka District Magistrate, East Khasi Hills District da pynmih hukum ko wow pynbna ya waroh iwi i yung ka Jngun Marbaniang wa em ha Mawpat Circle-III kam i Containment Area yow khang yei psiah i mih khlem da yoh bor cha ini i thaw.
Ya kani ka hukum da pynmih hadien wa yoh yaka Report na u Incident Commander, Zone-V; wa kiwa chi yung (ki 7 ngut) yong uwa khlaad na u COVID-19 kiwa em hei maa namo ki High Risk Primary Contact yong uwa khlaad haka 10 tarik uni u bnai uwa sah ha Mawpat Circle-III, da kyntait ki wow leh yaka COVID-19 Test hadien wa u Medical Officer In-charge da phah u ya kani ka manyung wow leh ki ya i Test wei da pyrchang leh daka Dorbar Chnong wow pynsñiawthooh ya kani ka manyung wow leh ya i Test.
Da sñiawthooh wa kini ki 7 ngut ym bien ki wow pdiang wa uwa khlaad toh uwa yoh COVID-19 wei deiwa kyntait ki wow leh ya ka Test ym tip lada ki dkhot kani ka manyung man ki kiwa yoh namo ym em ya uni u khñiang wei neiliang ki bor District leh ym kwah ki wow booh hei maa ya kiwi lada ki dkhot kani ka manyung yoh ki wow lai u wan katwa ngait
Kamtæ da emkaam wow pynbna ya waroh iwi i yung kam i Containment Area hadooh i por wa u Medical Officer In-charge ong u wa kini kiwa suba wa ye ki wow yoh COVID-19 man ki kiwa da chait wei ym booh de ki ya kiwi hei maa lane hadooh wa bien ki wow leh ya i Test kamjooh manda dep u Medical Officer In-charge wow pait bniah yei chait i khiah kini kiwa em hei maa yow pyntikna wym em yoh ki yaki dak ki chin wa chitom.
Kamtæ da khang leh ya kiwon kiwon wow psiah cha ini i thaw kamjooh kiwa em hapoh ini i thaw wow neh bait ki hapoh yung ki.
U Incident Commander, Zone-V, Shillong u pait u ya ini yow pyntikna wa da booh thij yaki kyndon.
Ya kiwa leh pyrchah daw pynchitom katkam ka Disaster Management Act, 2005 wa IPC.