Shillong: Ka sorkar Meghalaya da kyntait ko war næ yei chah pynbaad wa u Uranium wa yoh kem ha Manipur toh uwa chah rah næ challan tooh na ka jylla Meghalaya.
U Conrad K Sangma, Montri Rangbah hawa yaklam wa ki laad pathai khubor da ong wa ym em kam ka tæ ka pynbaad wa ha ka jylla wa tih yabor ya u Uranium, tangwa da ong u wa ka sorkar daw booddien ko ya kani ka kaam wow pyntikna wa i tih Uranium ym em ko ha kani ka jylla.
“Kamwa man hi hadooh kattæ ym em kawon kawon ka tih Uranium hapoh ka jylla kamwa pynbaad lyngba ki laad pathai khubor. U Uranium man u ka phang wa ktah ya ka yap ka im ki paidbah Meghalaya, ka sokar leh ka khang pyrchah wow tih ya uni u mar pohkhyndaw khlem yoh bor,” da ong u.
Heiyatoh wa chem ki pulit ka jylla Manipur ya ka yusong Uranium wa da pynbaad wa da challan deiwa tooh na kani ka jylla, neiliang yong u Montri Rangbah da ong u, “Lada man kamtæ da man ko kayi kayi kawa khia sakhiat wei ka sorkar daw pait ko wa kammon u leh.”
Kam wow pynkynmoo waka KSU South West Khasi Hills District da pynbaad ko wa i chem ya ka yusong Uranium ha ka jylla Manipur da pynyoo che ko wa i tih Uranium tooh na Meghalaya wei wow challan ya uni u mar pohkhyndaw da ka UCIL wa ka AMD na Shillong neidaw ka yusong em ka chap yong ka UCIL waka Atomic Minerals Directorate wa em yaka North Eastern Region Headquarter ha Shillong.
Discussion about this post