U Montri Rangbah ka jylla u Conrad Sangma da kyntait u yei pynbaad uwa yahkhmat ka liang pyrchah u Dr. Mukul Sangma uwa da kam wa u Conrad deilang wa u James Sangma da pynwit wei ym em e laad ki yaki pulit wow pyndep ki yaka takit yeiwa jia ha SS Netcom deiwa kyrriah kaam noh yaki pulit kiwa pynman yaka takit.
U Dr. Mukul da pynbaad u wa ka Call Centre wa krehkaam napoh ka SS Netcom da leh ko yaki kaam chukor poisa ya kiwa na baar ri iwa da pynche u Conrad ynne ka sngi hawa yaklam wa ki laad pathai khubor waka takit wa da leh hajrong ini wa jia da lai ko hadooh chi snem nadooh u 2017 wei i kyrriah kaam yaki pulit toh kamwa jooh leh hi manda toh i por wei da kyrriah ya kiwa boon ym du ya uwi arngut.
Chooh chooh da ong u leh wa uwa yahkhmat ka liang pyrchah mylliñ u wow khana wa haka takit da dep wow kem wei da pynchitom leh ya kiwa emkti.
Da khana u leh wa yaka SS Netcom da sdang kam ka thaw wow booh Call Centre kawa nyngkong dooh ha Northeast kiwa da pynlai da ka hi neibynta ka Aircel, Airtel wa Idea wei hadien wa mih noh boon ki Call Centre da rai wow e wai noh ya ini thaw neidaw wa ym de i yoh nong naka khih kamjooh yow lait u sepai ki tiar ki tar kiwa da dep thied da dep pyndait yow pynemkaam.
Kamtæ da ong u wa chwa wow e cha kiwi wow leh ki yei kaam yong ki da emkaam leh wow yoh yaki NOC naki waheh chnong, u SP wa ka District Council kiwa da ye kiwa chim wai ya ini i thaw wow pynbiang katkam ki kyndon wei waroh iwa jia toh iwa leh da kiwa chim wai ya i thaw krehkaam ka SS Netcom wei ym toh iwa leh daka hi.
U Conrad pynkynmoo u leh yeiwa jia haka sorkar warim wa em i dai yaki kynthai na kawi ka Guest House wa mantre da u Home Minister katai ka sorkar heiwa du hapoh chi bnai wa pynman yaka takit, da kyrriah kaam wot ya u pulit wa pynman yaka takit, kamtæ da kylli u lada ini wa leh ki ym toh i pynwit yaka takit.
Heiyatoh won wa i pynbaad u Dr. Mukul wa dai syad dor yaki bai chrot bordiñ heiyatoh waka Scheme ka sorkar pyrdi wow pynpoi bordiñ cha waroh ki yung, u Conrad da jubab u deiwa ong wa ka Bill leh da pdiang daka sorkar pyrdi wei lada em i leh bakla da chah kyntait kini ki Bill.
