Kyntait u Conrad yei mih khubor wa daw thied Helicopter ka sorkar

Hadien wa kawi ka kot khubor pharæng na Shillong da pynmih khubor ko wa ka Meghalaya wot hawa man ko ka jylla kawa ar hei dooh wei duna poisa tangwa ka sorkar MDA wa yahkhmat da ka NP daw thied ko da ka Helicopter neibynta u pynemkaam ki VIP.

Heiyatoh wa ini, neiliang u Montri Rangbah ka jylla, u Conrad K Sangma da ong u wa kani ka kot khubor sa chisien ym em thooh bniah ko neibhah ka sorkar ym em khut Tender ko yow thied da ka Helicopter wa thymme neidaw wa ki Helicopter toh kiwa sy’at dor bha.

Da pynche u leh wa ka sorkar da khut ko yaka Tender yow chim wai chipor ya ka Helicopter deiwa su manda pynemkaam donhi deiwa kheiñ dei yong kynta wei kani toh kawa biang dooh i rukom leh dei wym hap u lut phut.

Chooh chooh da pynche u wa ka Helicopter wa em katni toh neibynta ki Tourist wei kawa lai na Shillong cha Tura neitæ cha Guwahati wei ini da pynthut bha ya ki paidbah manda em ki VIP wa pynemkaam ya kani ka Helicopter.

Related posts

Wa thung ka BJP da ki bru yong hi tæ mih i kynrum kynram ha NEHU: Ronnie

November 15, 2024

Dang jan u lai na Shillong cha Vietnam, Thailand, Laos, Cambodia wa Burma bar cha Delhi: Conrad

November 14, 2024

Kamtæ da ong u wa deiwa chim wai da kawi ka Helicopter daw lait na ini i chah pynthut ki paidbah wei ka Helicopter toh kawa mantre da ka Company yong ka hi wei ki Pilot toh ki yong kani ka Company ymtoh ka sorkar u thied ko ya kani ka Helicopter wei ka sorkar u su ko dei yong kynta dei heipor wa pynemkaam ka donhi.

Da ong u leh wa emkaam hi ya ka Helicopter neipor cheipor tangwa ymtoh man-i-por neibhah yarap bha ko yow lait u sepai i por wei yeini u leh deiwa chim wai neibhah u thied toh i wym ye u man neidaw wa joor sy’at ki kamjooh wow sumaar ki wei daw hap wow thung sa ki Pilot i wym yahaap u leh hapoh ka jylla.

U Conrad da ong u leh wa kani ka jooh ka kot khubor ini wa dep da thoh ko wa em i baam tooh Rs. 1300 klur ka poisa hapoh ka chnat Tourism wei hadien ini, kani hi ka khubor da chem ko wa kani ka Scheme toh kawa Rs. 13 klur wei ym em itæ i baam tooh yaka poisa heiwa dang em kamwa Rs. 70 lak i kreh i wym pu em dep kreh wei da phah ka sorkar leh ya ki Contractor yow pyndep yei kreh wa dang sah.

Kamtæ da ong u wa lada kani ka kot khubor pteiñ ko wow pynmih kam kini ki jait khubor wa bakla, ki paidbah leh daw dooh ki yei chaniah iwa daw ktah joor bha yei pyrtuid yei naam kani ka kot khubor.

Hawa kylli lada ka sorkar daw leh ko da ka mukotduma ya kani ka kot khubor, da ong u wa daw pait won iyi wa ye u leh da ki chnat sorkar wa pait yeini.