Shillong: Katwa ka kyrtong President yong ka UPA ka Meira Kumar dang kam ko wa ka UDP kyrchaan ko ya ka kam ka kyrtong President ka ri, tangwa neiliang u President ka UDP u Dr. Donkupar Roy da kyntait u ya ini.
Ka Meira da ong ko yeini hawa yaklam ko wa kiwa thoh khubor ynne ka sngi heipor wa wan yoohkjat ko ha Shillong wow paan yei kyrchaan na ki ki MLA wa MP ha kani ka Election President ka ri India ka wow pynman ha ka 17 tarik uni u bnai.
Ha kani ka yalang yalap Election yong ka Meira, ka Party UDP leh da emlang ko hapoh i yahkhmat u Dr. Donkupar Roy.
U Dr. Donkupar da ong u wa ka UDP da wan ko ha ka yurim hadien wa da khut ka Meghalaya Pradesh Congress Committee (MPCC), tangwa ka Party won ym em yaklam ki wow kyrchaan ya ka Meira.
“Ki MLA ka party daw yachem ki ha chwa ka 17 tarik uni u bnai wow pyrkhat yei yi u jied yow man President ka ri” ong u Dr. Donkupar.
Da ong u leh ka Party daw kyrchaan ko ya u/ka kyrtong wow jop wei ki wow em ha ka liang synchaar.
Katkam i ong u Dr. Donkupar ka yurim (ideology) wow yaleh Election President ka ri India ym pu poi ko cha kani ka bynta wei ka Party lada wan u kyrtong ka NDA, u Ram Nath Kovind daw li ap li sñiaw hi ko yeiwa yalap Election u.
U President ka UDP da kyntait u leh wa em i yaphær yumut waka HSPDP neibhah ka ym em wan ko cha kani ka yalap Election wa khut da ka Congress neibhah ini toh i khut ka MPCC ya kiwa samen ym toh ya ka Party.
Discussion about this post