U MLA ka Congress uwa man leh uwa yahkhmat ya ka Liang Pyrchah, u Dr. Mukul Sangma da kyntait u yei mih khubor wa oo deilang wa kiwi ki 13 ngut ki MLA daw mih ki napoh ka Party deiwa pdiang wa em hi i eh i khoo.
Hawa yaklam wa kiwa thoh khubor hei thaw sah u ynne i janmiet. U Dr. Mukul da ong u wa da chah khut u cha Delhi wei daw lai u ha kani ka sngi Bibar.
“Ynne ka sngi da pyntip cha nga ya ini i yachem wei mynstep daw em i ya ka Pradesh Election Committee Meeting neibynta ki kyrtong ka Election chiteiñ samoi. Ha ka sngi Bibar daw ye O wow lai,” da ong u Dr. Mukul.
Hawa pdiang wa em hi i ood hapoh ka Party wei da em kiwa da chah ktah chwa na ini, uwa yahkhmat ka Liang Pyrchah da kdaw u ya u MDC ka Congress ha ka Khasi Hills Autonomous District Council, u Lamphrang Blah uwa da mih na ka Party wow yakhun ya ka Mawphlang Bye-Election na ka Ticket ka National People’s Party.
“Kini toh ki dak wa pynyoo wei ini toh du i kyndian donhi. Kamtæ da emkaam wow pynbiang hei por wa biang, itæ chwa ka Election 2023,”da khana u Dr. Sangma.
Da ong u leh wa i eh toh iwa da em bait, tangwa emkaam wow pynbait ya waroh iwa eh wei emkaam yei yaichah.
U Dr. Sangma da pynsñiaw u yei kyrmen wa waroh kini ki kaam daw ye u pynbait hapoh yung ka Party donhi.
Ka khubor kawa da mih chwa ini da ong wa u Dr. Mukul Sangma ye u wow psiah cha ka Trinamool Congress deilang wa kamwa 13 ngut ki MLA.
