U Montri wa pait ya ka chnat Lum Dan (Taxation), u James PK Sangma da ong u wa em chiboon ki daw kiwa pynman ya i dor yong i Petrol wa Diesel wow ku smat bha ha kini ki kajiak sngi wa da dep, wei da em kiwa ka sorkar jylla da ye ko wow leh iyi iyi wei em leh wa rap ye wow leh, heiyatoh wa i ku dor i phñiang kari.
Hawa kylli ya ka dan wa ka sorkar da yoh lum man-u-bnai na ki Petrol Pump, u James da ong u wa ka dan ym jooh neh kamjooh, tangwa kawa kylla na-i-por cha-i-por, wei phær na uwi u bnai cha uwi won. Hawa kylli chooh chooh, da ong u wa ka sorkar hadooh katni ym pu yoh ko wow yaklam hajrong i dan yong ka Petrol wa Diesel, tangwa da pynsñiaw u yei sñiawkhia leh wa kiwa chong chnong ki hap ki wow maad yei eh wei ka sorkar leh daw bichaar bniah bha kammon u leh.
Kam wow pynkynmoo wa ha u Naiynru uni u snem, ka sorkar da wanrah ko ya ka Scheme One Time Settlement (OTS) yow maap ya ka dan yong ki Petrol Pump hadooh 30%, wei hajrong ini i rai yong ka sorkar wow maap ya ka dan, da mih leh i pyrchah na ka seiñ Hynniewtrep Youth Council (HYC) wei kamjooh na ka Congress kawa em ha ka Liang Pyrchah ha ka jylla. I pyrchah wow pynkrehkaam ya katai ka Scheme toh neidaw wa ka sorkar daw dooh nong ko kamwa T. 195 klur kawa toh ka poisa ki paidbah kawa da su ha i por wa lai thap phñiang.
Hawa kylli ynne ka sngi hajrong katai ka Scheme, u Montri ka Taxation da ong u wa ya ka OTS ym em da pynkrehkaam du ya ki Petrol Pump tangwa ya kiwi leh ki kaam khayi kiwa chem yei eh wow su ya dan cha ka sorkar, wei da kyntait leh wow em i dooh nong wa hadooh T. 195 klur ya ka jylla, neibhah ka OTS da pynkrehkaam wow yoh ya ka dan wa khlem su kattu la 15-18 snem, heiwa da ong wa ya ka 30% kawa da maap man ko ka kuna wa su slem (Late Fee Charges) wa kiwi de wei ym em itæ i dooh nong.
Kam wow pynkynmoo wa ka sorkar lyngba ka dan wa da yoh wow lum na kamwa 230 tylli ki Petrol Pump kiwa em ha ka jylla, ha u snem 2018-19 dapoi T. 445.77 klur, ha u snem 2019-20 T. 367.86 klur wa ha u snem 2020-2021 da yoh lum T. 529.88 klur.
