Deiwa sñiawkhia yei lait tooh ka bui (Report) ka Comptroller and Auditor General (CAG) ka India, u Montri ka chnat Bordiñ u James Sangma da ong u wa chnat daw phah pynman ko da ka takit wa bniah yow chem kammon kani ka Report kawa ym pu em pu em wanrah ha ka yung dorbar da mih khubor ko.
Ha ka khubor wa da mih da ong wa ka CAG da chem ko yei sepai T. 149 klur hawa pynemkaam ya ka Saubhagya Scheme kawa da mang wow pynpoi bordiñ cha waroh ki thlu yung. “Ini toh iwa khia bha i kaam kammon wa poi kani ka Report cha kiwa thoh khubor wei daw pynchitom ya ki sahep lane kiwi de kiwa emkti ha ini i kaam,” da ong u James.
Da ong u leh wa ym tip u ya iwa em ha ka CAG Report neibhah ha kawa da dep pynmih khaddooh ym em klam ka CAG chaphang ka Saubhagya Scheme.
Kamtæ da ong u wa ye u man wa ka CAG da kylli hi-eh ko heiwa ka MeECL wa kiwi wa emyatoh wa ini i kaam da pynkhreh ko wow e yei jubab.
U Sangma da ong u leh yei yathong yow yoh kreh namo ka Bidding Process da leh deiwa pait bniah ka REC PDCL wei bha wow wanrah da ki yukheiñ hajrong ini da ka Enquiry Commission kawa da thung ha ka 30-06-21 yow takit yei rukom khut Tender, ki rukom lum bai bordiñ wa i rukom thung bru hapoh ka MeECL.
Hawa kylli wa lada bha wow hiar chuki u yow ye u pynman ya ka takit wa khooid hadien wa mih kani ka khubor, da ong u wa ka takit chaphang i krehkaam ka MeECL toh kawa dang lai chakhmat.
Hawa kylli yei yajan u wa u Himanshu Jain, Director ka Satnam Global kawa man kam kawi na ki Contractor heiwa katkam ka khubor da ong wa ki Transformer wa pynbiang da kani ka Company ym toh kiwa ym em miat wei boon toh kiwa da sih, u James da ong wa ini toh iwa bakla wei man ko du wow pynboodnaam donhi.
Heiyatoh won yei leh smat wow pyndep noh ya ka Saubhagya Scheme, u James da ong u wa kani ka Scheme toh kawa da booh dei por u pyndep, “Da poi ka chithi na ka sorkar India kawa ong wa toh u pyndep noh ya kani ka Scheme chwa ka 31 tarik uni u bnai wei lada ym ye wow leh ya ini, ki sorkar jylla hap ki wow bahkhlieh ya waroh i lutphut hapoh ka Saubhagya Scheme.”
Heiyatoh wa hadooh katwon da ye wow pynkrehkaam ya ka Scheme, da ong u wa da jan ye hi wow pyndep kamtæ da man ko kawa da pyndep.
Da pynche u leh wa ka sorkar jylla ngait ko wow man kawa khooid wei kawa em yei kitkhlieh iwa da pynman ya ka sorkar wow booh ya ki takit wa laitlooid namo ka Enquiry Commission heiyatoh wa kiwa boon ki Scheme ka sorkar pyrdi.
Ki kyndon toh wow pait bniah yei rukom khut Tender wa kiwi de, heiwa da yooluti u wa ka Enquiry Commission daw wanrah ko ya ka Report wa bniah yow ye u chem tre ya ini i kaam.
“Da yooluti jhan i wa daw poi smat kani ka Report yow ye u pykhooid ya ka la-ær wa yatoh wa waroh kini ki kaam wei ka sorkar daw leh ko yeiwa emkaam katkam wa chem ka takit,” da ong u.
