U Symbood Montri Rangbah ka jylla uwa pait ya ka chnat Bordiñ, u Prestone Tynsong da kyntait u wa da em i khynra da ka chnat Enforcement Directorate ya ka yung krehkaam ka MeECL kawa em ha Lumjingshai, Shillong.
Katkam wa mih khubor, da pynbaad wa ka yung krehkaam yong ka MeECL da chah khynra ko ha ka Enforcement Directorate ha kini ki kajiak sngi wa da dep, wei da pynbaad leh wa katai ka chnat da kem ko leh ya ki kot ki sla wa yatoh waka Soubhagya Scheme, kawa man ka Scheme yong ka sorkar pyrdi wow pynpoi bordiñ cha waroh ki manyung wym pu yoh bordiñ.
Hawa klam ynne ka sngi, neiliang u Prestone da kyntait u ya ini deiwa ong wa toh ka khubor kawa bakla wei ka wym em yurim. Da ong u wa ym em iwon iwon i chah khynra lane i chah kem ki kot ki sla.
Da pyntip u wa i paan yutip na ka MeECL da ka Enforcement Directorate toh kawa nadooh u Naichiphaw, 2021, wei neiliang ka MeECL da e ko leh ya ki kot ki sla wa i pynche wa ki yutip wa emkaam ki bru ka Enforcement. Da khana u leh wa ha ka sngi nyngkong kani ka tayaw leh ka Enforcement Directorate da paan chooh chooh ko ya ki kot ki sla ya kiwa ka MeECL da e ko heiwa da pynrap u wa ym em itæ i chah khynra kamwa da mih khubor.
Hawa yatoh waka bui (Report) wa laitlooid hajrong i chah pynbaad baam-tooh ha ka chnat Bordiñ, u Prestone da ong u wa ka sorkar leh dang yang ko ya kani ka Report neibhah da ekti cha ka chnat Political, wei hadien wa dep ki wow bichaar bniah daw phah ki cha ka chnat Bordiñ, deiwa pynrap wa ym slem de ka chnat daw yoh ko ya katai ka Report kawa da emlang wa i e yumut.
Puræ leh: Sñiawkmen ka TUR wa sdang mih pyrthai i baam-tooh naka Saubhagya Scheme
