U Symbood Montri Rangbah ka jylla, u Prestone Tynsong da kyntait u yeiwa pynbaad wa da pynemkaam bakla u ya ka poisa hadooh T. 43 klur heipor wa pynlut neibynta wow yaleh pyrchah ya ka khlam COVID-19 hapoh Meghalaya.
Ya ini da ong u Prestone hadien wa mih pyrthai ka jubab RTI u Disparsing Rani heiwa da pynbaad wa ka chnat chait i khiah ka Meghalaya ym em yukheiñ ko hadooh T. 43 klur ka poisa wa da yoh na ka sorkar pyrdi heiyatoh wow yakhun pyrchah ya u COVID-19.
Neiliang u Prestone da ong u wa i pynbaad wa ka chnat i chait i khiah da pynemkaam bakla ko hadooh T. 43 klur toh iwa khlem yurim neibhah ya ka RTI da nujor wa iwa jubab u Montri i chait i khiah hapoh ka Yung Dorbar Chna Aiñ.
“Heipor wa man ka Dorbar Mang Tangka ym pu em poi lut ka poisa na ka sorkar pyrdi wei da pynlait poisa ko ymtoh du chisien donhi wei ha itu i por wa jubab u Montri hapoh ka Yung Dorbar, ka poisa ym pu poi lut ko cha ka sorkar jylla,” da ong u Prestone.
Da ong u leh wa heipor wa pynbiang ya ki yukheiñ poisa kawa wan na ka sorkar pyrdi næ ka sorkar jylla, wot chipiah leh ym ye wow pynwiar na ka ‘Head of Accounts’ kawa mynjur wei bichaar nadong chadong da ka yung krehkaam u Accountant General (AG) wei ka CAG Report leh daw poi ko.
“Ha u bnai Wisu (Mar) daw wanrah ya ka bui (Report) yong ka CAG, wei ha itæ i por daw chem lut nadong chadong,” da ong u.
U Prestone da ong chooh chooh u wa ya iyi wa ka sorkar da pynlut ko, neiliang ka yung krehkaam u Comptroller & Auditor General (CAG) da pynbiang lut ki yei thoh nadong chadong wei ym em wot tang chi naya kawa da pynemkaam bakla lada toh ka poisa yong ka sorkar pyrdi lane ka yong ka sorkar jylla.
Puræ leh: Yoh ka jylla T. 119 klur neibynta ka khlam COVID katwa u James ong u T. 76 klur: Disparsing Rani
