U Metbah Lyngdoh, Speaker ka Meghalaya Legislative Assembly da pynmih hukum u ynne ka sngi heiyatoh i mih ki 12 ngut ki MLA ka Indian National Congress yow psiah cha ka All India Trinamool Congress (AITC) wa ym em tyngkheiñ ki ya ka Tenth Schedule wa ya ka Meghalaya Legislative Assembly (Disqualification on Ground of Defection) Rules, 1988.
Ka hukum da ong ko wa hadien wa da puræ bniah ya ka ujor wa e ka Dr. M. Ampareen Lyngdoh, MLA da chem wa ki 12 ngut ki MLA kiwa chah ujor da leh ki yeiwa emkaam katkam ka aiñ wa ki kyndon kamtæ ym ye wow pyndam noh ya ki.
Kam wow pynkynmoo wa ha ka 29-10-21 da chah ujor chwa ki 10 ngut ki MLA ha ka Ampareen kitæ pyrchah ya u Dr. Mukul Sangma, u Marthon Sangma, u Jimmy D. Sangma, u Lazarus M. Sangma, ka Miani D. Shira, u H.M. Shangpliang, u George B. Lyngdoh, u Winnerson D. Sangma, ka Dikkanchi D. Shira wa u Zenith M. Sangma.
Ha ka 10-12-21 da ujor won pyrchah ya u Charles Pyngrope wa u Shitlang Pale.
Ya ka ujor da e deiwa kdaw wa tyngkheiñ ya ka Tenth Schedule ka Constitution ka India wa hapoh ka Rule 7(3)(b) ka Meghalaya Legislative Assembly (Disqualification on Ground of Defection) Rules, 1988.
Heiyatoh wa ini, ka Ampareen da ong ko wa ym lai de chakhmat ya ini wei daw burom ya kani ka hukum wei daw pyrkhat noh ya ka Election kawa man kawa biang ka rynsan wow yaklam yeini wei ki bru paidbah daw e ki ya ka rai ya kini kiwa chet kylla manda pynbna ya kiwa jop Election.
