Ka seiñ Akhil Bharatiya Vidyarathi Parishad (ABVP) Meghalaya, ynne ka sngi hapoh i yahkhmat ka Darilin Tang kawa man kam ka State Secretary ka seiñ da phah ko da ka dorkhat cha u Montri Rangbah ka jylla u Conrad K Sangma heiyatoh wa ka Joint Entrance Examination (JEE kamjooh leh wa ka NEET) 2020 kamwa ka Central Government da pynbna ko wow pynman bait ya kitai ki Exam.
Ha ka dorkhat ka seiñ da kyrpaad ko ya ka sorkar jylla wow chimkhia ko wow pynbiang kari ya ki khynnah ki wow lai thoh ya kitai ki Exam heiwa ya ka JEE daw man ko nadooh 1 hadooh 6 Naikhynde 2020 katwa ka NEET won wow man ha ka 13 tarik u jooh u bnai.
Ka seiñ ong ko wa kam ini i por wa da chah ktah ha ka khlam COVID-19, ki khynnah daw chem chitom ki wow poi cha ki Exam Center ki yong ki.
“Kani ka Exam JEE wa ka NEET da man ki kiwa emkam bha ya ki khynnah wow puræ ha ki laiñ Engineer wa Doctor,” da ong ka Darilin Tang deiwa pynrap leh wa em chiboon ki khynnah wa da pynkhreh neibynta wow yakhun ya kini ki Exam wei da pynlut por ki la chi snem ar snem hei wow lai esikai pynpliah (Coaching) kamtæ lada ki khynnah wym yoh laad ki u thoh ya kitai ka Exam daw man iwa doohnong ya ki wei daw ktah ko leh ya ka mynried ka mankawi ka yong ki.
Kamtæ ka seiñ da kyrpaad ko ya ka sorkar jylla Meghalaya wow yarap ko ya ki khynnah ya i thaw sah leh neibynta kitu kiwa wan na jngai chnong yow lait ki khynnah u chem chitom.
