Shillong: Ka Co-ordination Committee on International Border (CCIB) ynne ka sngi da lai kyntu ko ya u CEM ka Khasi Hills Autonomous District Council (KHADC), u HS Shylla wow dam u e No Objection Certificate (NOC) wow kær sainaar-chieh ha ki khappood ka Bangladesh khlem bichaar bniah wei wow pynbait khnang wa ym dooh ya ki thaw cha Bangladesh.
“Kani ka toh ka Executive Committee wa thymme kwah i wow pynsñiaw wa emkaan wow pait chwa ya u pood u ang chwa wow kær sainaar-chieh,” da ong kiwa kitkaam ka CCIB.
Hawa yaklam wa kiwa pathai khubor kiwa yahkhmat ka CCIB wa kynthup wa u Chairman, u Sukkynjai Myrchiang wa u Secretary, u Kmen Myrchiang da ong ki wa ka Committee ym pyrchah ko yei kær sainaar-chieh ha ki khappood tangwa yieñ ki ha ka jooh ka yurim wow pynbait chwa, kamwa da dawa na ka sorkar wow kær nadooh Zero Line khnang wa ki paidbah ym duh ki ya ki thaw cha ka Bangladesh.
Kam wow pynkynmoo heini ka CCIB da dawa ko na u Montri Rangbah ka jylla, u Conrad K Sangma wow pynbait thymme noh ya u pood u ang wa tikna hapyrdi ka India wa Bangladesh chwa wow kær naar-chieh ha ri-loom Khasi Jaiñtia.
Kiwa kitkaam kani ka seiñ da ong ki wa ki thaw wa haap hapoh ka KHADC wa em u pood wa ka Bangladesh toh nadooh Nongjri hadooh Umsyiem iwa jrong kamwa 40 km hadooh 45 km.
“Neiliang u CEM da kular u wa ympu ye wow leh jhan yeini i kaam, tangwa daw haap puræ bniah chwa wei ym nood wow lai pyrchah ya ki paidbah,” da ong ka seiñ.
Katkam i ong ki dkhot ka seiñ, neiliang ka JHADC dadep e NOC ko tangwa da pyndam noh hadien wa yoh ujor ko na ki tre thaw.
“Ym kwah i wow dooh ta ki thaw cha Bangladesh, khamtam wa man ki ki thaw rep,” da ong ki dkhot ka seiñ.
Kam wow pynkynmoo heini heipor wa man CEM u Andrew Shullai ha JHADC da pyndam noh ya ka NOC wa da e heipor u CEM wa chwa yong oo, u Thombor Shiwat wow kær naar-chieh ha ki khappood India – Bangladesh ka West Jaiñtia Hills.
Discussion about this post