Jowai: Ka Dorbar Elaka Raliang, ynnin ka sngi da e dorkhat ko ya u montri rangbah ka jylla lyngba u montri ka chnat Fisheries, u Comingone Ymbon heiyatoh wa u pood u ang wa ka jylla Assam.
Ha ka dorkhat ka Dorbar da ong ko wa ha ki snem wa da lai ki jaitbru Pnar wa Khasi wa im hajan u pood wa ka Assam chah pyndik bha ki ha ki seiñ kieñ suloi ka Karbi kam ka Karbi National Volunteer wa ka United People’s Democratic Solidarity, wot hadooh ki pulit wa kiwa kreh ka chnat Forest ka Assam.
Da ong ko wa ini i chah pyndik da pynbor i ya ki paidbah Khasi Pnar wow yut chnong ki cha Barato ha u 1971 wa cha Sahsniang ha u 2003, da em leh i chah dat, chah lute, rahbor, i slaitbor wa kiwi kiwi wei da pynkynmoo leh ya u waheh chnong ka Moojem, u Photsing Dkhar uwa da chah rahbor ha ka 3 Naiynñiaw 2003 wei hadooh ynne ka sngi ymtip heiwon u.
Chooh chooh da ong ko wa kini ki chnong man ki kiwa sahdien bha hapoh jylla neibhah wa sih u sarok, duna ki Mobile Network wa kiwi kiwi. Ka jylla manda wanrah ko ya ki kaam pynroi ka Meghalaya ki pulit ka Assam wan pyndik pynthut wei wot wow pynsangeh ya kini ki kreh.
Da ong ko wa chwa wow pynbna ya ka Meghalaya kam ka Autonomous State ka India ha u Naitung 1970 ym em u mih i kyntien wow chim namo wow e ya ki chnong neibhah wa ki ri-loom Khasi wa Jaiñtia dang em ki hapoh ka Assam tangwa hadien ka 1972 manda yoh jylla pura ka Meghalaya mih i kulmar heiyatoh wa u pood u ang.
Ka yalang wa nyngkong hapyrdi ki montri rangbah ha ka 10 Naikhynde 1971 heipor wa man montri rangbah u Capt. WA Sangma da rai wow kheiñ katkam i boon ki bru Mikir (Karbi) wa ki Pnar ha ki chnong wow pynskem ya u pood tangwa hadooh katni ym em krehkaam i.
Neiliang ka Dorbar da kyntu ko ya u montri rangbah wow pynbait noh ya ini i kaam khnang wow ye u wanrah yei chongsuk ha ka thaaiñ wei wow yoh kini ki paidbah yei hok yong ki kam ki bru.
Ya kani ka dorkhat da ekti da u Chairman ka Dorbar Elaka, u Chawas Lyngdoh wa u Secretary ka Dorbar, u RN Parien.
Discussion about this post