Kyntu ka HBDRF yaki Karbi wymtoh u thooh laad pynawri wei ki Pnar leh ym swe ki u yada

Ka Hynniewtrep Border Dispute Redressal Forum (HBDRF) lyngba u Chairman yong ka, u Chandame Sungoh da kyntu wei maham u ya ki Karbi khamtam kiwa chong wa sah hapyrdi ka Elaka Labang Nangphyllut Pangam Raliang wa West Jaiñtia Hills District wym toh u wanrah ki iwon iwon i kulmar næ wanrah i sñiawphær jaitbru wei i ya mih umsnaam.

Ka Forum da jubab khor ko leh yei klam u Mirjeng Kro uwa yahkhmat ka Karbi Students Association (KSA) hajrong ki mat wa oo da klam u, wei wym pdiang ki leh yei rukom pynbaitpood daka Give and Take Policy tangwa deiwa kwah ki paidbah.

Hajrong ini, u Chandame Sungoh ong u wa kani toh ka rai yong ki ar sorkar u pynbait yow pood u ang. Kamtæ chong haki la pdiang ki næ wym pdiang, tangwa ymtoh won u pynkulmar yaki paidbah. Heijooh i por ong wow yieñ skem bait katkam ka Notification 13-04-1951 kawa man ka Constitutional Rights yong ki.

“Hao wym ye u len wa em sakhiat katæ ka Notification, wei ki Karbi leh toh u tip ki yeiwa sakhiat hachwa kani ka Notification wa hadien ka Notification. Kam kiwa chong chnong ka Block-I ka Forum u yieñ skem bait i hajrong ka yurim wa i toh ki tre ri tre muluk wei yaka Notification wa leh thok leh embor daka sorkar Assam wym pdiang i ka,” ong u Chairman ka Forum.

Related posts

Lai ood ki MDC ka VPP ha ka sorkar wym yoh Scheme sorkar pyrdi ha ki Constituency wa em ha sor

May 13, 2025

Lada ka sorkar sñiaw ko wa emkaam palat ko wow wanrah luti rel ye ko wow lai chakhmat: Ardent

May 12, 2025

Neitæ katkam ka Notification u 1955 wa 1957 wei katkam ka Joint Ground Demarcations yong ki artylli ki Districts Council kitæ ka United Cachar Mikirs Hills waka United Khasi Jaiñtia Hills ha u snem 1958 da pdiang da mynjur wow phah namo wow Re-Transfer biang yaka Block-I wa Block -II na United Cachar Mikirs Hills cha ka United Khasi Jaiñtia Hills.

Hajrong i ong uwa yahkhmat ka Karbi wa lada ka khyndaw yong ki u lai ko cha Meghalaya tæ daw jia kam ha Manipur. Ka Forum da jubab ko deiwa ong, kam ki paaid wa chong chnong wa ki tre muluk tre thaw wa em ka hok u dawa, tæ hawa kani ka thaw dang man ko ka Disputed Area kamwa da mynjur hi daka sorkar Assam, neiliang ka Forum daw yaleh ko daka luti ka hok wei luti ka aiñ wym toh u rah da ka wait ka suloi næ deiwa ya mynsoo.

Kamtæ ka Forum kyntu ko ya ki paaid wa chong chnong yong ka Block-I wymtoh u tieñ næ artatien hajrong i klam uwa yahkhmat ka KSA, tangwa u man chlur wei yieñ skem haka yurim.

Khaddooh ka Forum ong ko yaki Karbi wa lada jia wa sdang chwa ki ya ki kaam, ki Pnar leh ym swe ki u yada ya idæ wei wym chah jem hi wot ki.