Shillong: Ka People’s Democratic Front (PDF), kawa kyrchaan leh yaka sorkar synrop MDA, ynnin ka sngi da lai yachem ki ya u montri rangbah, u Conrad K Sangma hajrong ka phang wa ktah bha ya ki paidbah iwa ku ka bai bordiñ wei kamjooh wow pynkynmoo wow booddien yei dawa pynpsiah ya i ktien Khasi hapoh ka 8th Schedule ka riti synchaar ka ri India kawa dang sahteiñ wa ka sorkar India.
Ha ini i yachem da yahkhmat da u Banteidor Lyngdoh, President uwa man leh u montri sorkar wa pait ya ka chnat Agriculture & Sports, u Hamletson Dohling, montri sorkar wa pait ya ka chnat Urban Affairs deilang wa u Jason S Mawlong wa u Gavin M Mylliem, kiwa toh ki MLA wa kynthup ya u Auspicious Lyngdoh, Secretary wa u Ivanlumlang Marbaniang, Chairman ka Party.
“Da yaklam yei ku ka bai bordiñ iwa da jia ym du haki Constituency ka PDF kamjooh leh ha kiwi kiwi ki Constituency heiwa ki paidbah da chem chitom ki wow su heiwa nei 500-600 chi bnai da ku cha ki phaw hajar tyngka”, da ong u Banteidor Lyngdoh hawa yaklam wa kiwa thoh khubor hadien wa wan yachem wa u montri rangbah ha kamra krehkaam yong oo.
U MLA na Umsning, u Jason S Mawlong da pyntip u wa u montri rangbah da ong u wa daw khut yaka yalang wow yatai ya kani ka phang yaklam. “Ini da man kattu la 2-3 bnai wei i da chimkhia ya ini neibhah ini da ktah bha ko ya ki paidbah wei neiliang yong i da e yumut kammon wow pyndooh yeini i eh”, da ong u.
U Hamletson Dohling, MLA na Mylliem da pyntip u wa ha Constituency yong oo nachwa wa poi du T.600 næ T.700 tangwa katni da poi T. 7000-8000 ka bai thang bordiñ. “Nga da thoh oo cha u montri ka chnat bordiñ wei kamjooh cha ka yung krehkaam u CM. Ini i kaam toh iwa ktah bha ya ki paidbah wei i emkaam wei hap i wow pynsakhiat ya ini deiwa phah leh ya kitu kiwa ku ka bai bordiñ”, da ong u.
