Ynne ka sngi ka MLA na Sutnga Saipung, ka Santa Mary Shylla ha ka Yung Dorbar Chna-aiñ ka jylla da yaroh ko ya ka mang tangka wa da wanrah da u Montri Rangbah ka jylla heiwa da bhah hadooh T. 3,414 klur wow yada ya ka rymaw wei ini pynyoo i wa ka sorkar chimkhia ko wow yada wei wow pynneh pynsah ya ka rymaw talawiar soodong.
Da ong ko wa ka sorkar jylla da thoh ko cha ka sorkar pyrdi hei wow chna ya ka Land Customs Station ha Umkiang wei ini daw pynsuk i ya i khayi pateiñ wei i yoh khih yoh kreh ki khynroo kamtæ da kyntu ko ya ka sorkar wow chimkhia wow booddien yeini.
Heiyatoh wa ki sarok ong ko wa boon ki sarok kiwa da sih hapoh ka Constituency yong ka katwa kamtæ da kyntu ko ya ka sorkar wow chimkhia wow chna pynmiat noh yeini khamtam u sarok na Dkhiah-Sutnga-Saipung-Haflong uwa da emkaam u chna bha wa kiwi kiwi.
Da kyntu ko leh wow pynku kyrdan ya ka Umkiang PHC cha ka CHC neibhah kani ka thaw chakri ko ya palat 20,000 ngut kiwa chong chnong ha khappood.
Chooh chooh da kyrpaad ko wow chna noh ya ka District Auditorium hapoh East Jaiñtia Hills kamwa da kular u Montri Rangbah.
