U Montri Rangbah ka jylla, u Conrad Sangma ynne ka sngi da ong u wa da yoh yutip u wa em kiwa lai puræ napoh ka jylla kiwa da sahkut ha Ukraine heiwa da kyntu u leh ya u Montri ki kaam baar ri (Ministry of External Affairs namo ka MEA), u Dr. S Jaishankar wow pyntikna wa waroh u yoh ki u liwan deiwa suk kamjooh leh kiwi ki nong India.
Kam wow kdaw heini, da em hadooh kamwa 20,000 ngut ki nong India kiwa sahkut ha ka ri Ukraine hadien wa chah hiar thma ko ha ka ri Russia ynne i step ka 24 tarik.
Ynne ka sngi neiliang ka MEA da ong ko wa katkam ki Online Registration da em hadooh kamwa 20,000 ngut ki nong India kiwa sahkut hapoh Ukraine wei da em hadooh kamwa 4,000 ngut kiwa da yoh u liwan.
Da pyntip leh wa da yaklam wa ki ri wa yajan wa ki ri wa em hajan ka Ukraine wow pynsuk ya ki nong India manda kwah ki wow mih na Ukraine.
Ynne ka sngi neiliang ka seiñ Khasi Students’ Union New Delhi Unit leh da phah chithi ko cha u Dr. Jaishankar wow pynsñiaw yei sñiawkhia hajrong i kaam wa jia ha Ukraine, neibhah wa em kiwa puræ wa kiwa kreh ha kani ka ri na Meghalaya.
Kamtæ da kyntu ka seiñ ya oo wow chimkhia yeini khnang wa kini kiwa sahkut ha kani ka ri wa chah hiar thma u yoh biang ki wow liwan suk cha chnong yong ki.
