15 49.0138 8.38624 1 0 4000 1 https://wyrta.com 300 0

Chah jied u Titosster kam u CEM thymme ka KHADC

0 Comments
Advertisement ad1

Shillong: Ka yung dorbar ka KHADC ynne ka sngi da jied ko ya u Titosster Well Chyne u MDC ka UDP na Sohra kam u Chief Executive Member (CEM) wa thymme hadien wa da pynhaap noh ya ka Executive Committee wa yahkhmat da u Latiplang Kharkongor hadien soo bnai.

Ya ka Executive Committee u Latiplang hapoh ka kynhun ka United Democratic Forum (UDF), da pynhaap noh ynne ka sngi ha ka dorbar kyrpang ka KHADC da ka kynhun United Democratic Alliance (UDA) kawa yahkhmat da u Titosster Well Chyne kawa da poi cha ka 20 ngut ki MDC ha ka yung dorbar kawa 30 ngut. Ya ka UDA wa yahkhmat da u Titosster Well na ka UDP, da kyrchaan ka HSPDP 2, NPP 6, PDF 1, Congress 1, MDC samen u Lambor Malngiang waka Grace Mary Kharpuri, nalor ka UDP 8 ngut.

Ha kani ka jooh ka sngi, u Titosster uwa yahkhmat yaka UDA, da chah jied u khlem em uwa yaleh pyrchah hapoh ka yung dorbar, heiwa u Chairman u Pynshngain Syiem da phah yieñ u deiwa rah kti ya kitu kiwa pyrchah ya ka EC wa yahkhmat da u Latiplang. 

Kular u Titosster wym leh chiliang ya ki MDC

U CEM ka KHADC wa dang chah jied, u Titosstwell Chyne ynne ka sngi, da kular u wym leh chiliang ya ki MDC ka Council wa kynthup neiliang pyrchah wa ka liang synchaar. Hawa klam ha ka yung dorbar hadien wa da chah jied, u Titosster Well uwa jop MDC ar sien na Sohra na ka UDP, da e khublei u ya ki MDC kiwa da chaniah ha oo wow yoh ya kani ka bynta wow man kam uwa yahkhmat ka UDA wei kamjooh ya ka UDF kawa khlem booh kyrtong.

Da paan u leh yei ya krehlang yong ki MDC waroh neibynta kawa bha tam wow leh ya ka Council wa ka jaitbru wei wym toh u ya thaw para ki ya i duna.

Pdiang u Latiplang yei chah rem ha yung dorbar

U CEM wa da chah pynhaap u Latiplang Kharkongor da pdiang sñiabha u yei chah rem hapoh ka yung dorbar. Hawa klam ynne ka sngi hadien wa chah rem ha i pynyoo bor hapoh ka yung dorbar ka Council, u Latiplang uwa man CEM soo bnai khlem ye wow pynkrehkaam neidaw i huri hura ha ka Council, da ong u wa ym sñiaw iyi iyi yei chah rem neibhah wa toh ka bynta ka synchaar paidbah. Ha i jooh i por, da kyrmen u wa ka Executive Committee kawa thymme, wa yahkhmat da u Titossterwell u krehkaam bha ko neibynta i miat i bha ka Council wa neibynta ka jaitbru.

Advertisement ad1

0 Comments

Leave a Reply