Jowai: Kat dang lai ki por i eh i khoo kiwa ha rukom yatyngkhooh i wei wow pynbait yeini ki duk i u lai cha ki tnat sorkar wapher wapher, heithaw wow pyndep yei kaam du chisien lai hap lai i ar le sien yei jooh.
Kam chi bynta wow pynsuk yeini u Deputy Commissioner ka West Jaintia Hills u Arunkumar Kembhavi da pyntip u wa ye ki u phah ya ki dur, ki video, text message wa ki audio recording lyngba ka WhatsApp ha u nomber 94363-94363. Ya ki ujor ki paidbah upoi ki ha ka tablet wa laptop wa pynemkaam du kat u DC donhi.
Yei pyrtuit wa i number yong kiwa ujor u neh ki wa u DC donhi. Ini man i ka sien kawa nyngkong wa da sdang ki bor sorkar kam kani ka laad wow ujor tangwa hadooh ynne dang duna kiwa pynemkaam ya ka.
U DC da kyntu u ya ki paidbah wa ymtoh u tieñ wow ujor ha u WhatsApp neibynta i hok yong ki lada chem ki wa dooh light dooh um, slem ki bru sorkar u wankreh wa kiwi kiwi wa ktah ki i imlang sahlang.
Daw phah u DC ïaki ujor ki paidbah cha kawi ka dhab (group) wa em ha WhatsApp wa da chna kyrpang u ya kawa pyrtuit “DCC Jowai” namo ka District Coordination Committee Jowai. Hapoh kani ka dhab da em waroh ki ophisar na ki wapher wapher ki tnat krehkaam ka distrik.
Ki paidbah ki wym em Whatsapp leh ye hi ki u ujor ha uni u nombar deiwa phah da ki SMS tangwa ym ye ki paidbah u phone ha uni u nombar. Chooh chooh da pyntip wa lada em kiwa pynmekaam bakla ya uni u nombar deiwa ujor thok ujor kyndeh, ya ki nomber iong ki u khang noh wei ym ye de ki ujor ha uni u nombar.
Heijooh i por da ong u DC wa uni numbar toh du yow ujor donhi ymtoh ïow e khublei ïa u DC næ phah ïa ki message ‘Good Morning’ ‘Good Night’ wa kiwi kiwi wym yatoh wa ki kaam imlang sahlang.
U DC da ong chooh chooh u wa yooluti u wa ki paidbah u pynemkaam ki ya ka WhatsApp neibhah oo chim u wa i pynhun ya ki paidbah man i i kaam iwa ha khlieh tam yong oo kam u DC.
Discussion about this post