Kyntu u MDC ka Mynsngat Khanduli wow pynkha yaka Namdong C&RD Block

U MDC ka Mynsngat Khanduli Constituency u Dawan Lyngdoh da ong u wa ka sorkar MDA toh u pynyoh lane pynkha ya ki PHC/CHC, C&RD Block wa District, hapoh ka jylla ha ki thaw wa toh hok wow yoh, kamwa da yoo wa neiliang u Chief Minister, Conrad K Sangma da kubur u wow pynku kyrdan noh ya ka Mairang Civil Sub-Division cha ka District wa pura wa ya ka Mawryngkneng PHC cha ka CHC, wei kamwa da yoo katni wa ha Ri-loom Jaiñtia da em i dawa wow pynku kyrdan ya ka Laskein C&RD Block cha ka Civil Sub-Division wa i dawa wow pynkha thymme ya ka Wapung C&RD Block kawa da kular da u Conrad K Sangma wow pynmankaam ha iwon iwon i por wa ka sorkar yoh poisa ko.

Hajrong kini ki kular u Chief Minister wa kiwi ki Minister, da yooluti wa ka Namdong C&RD Block daw wan ko hakhmat dooh neibhah ka Namdong C&RD Block kawa da dep wow dawa wei da yoh thaw nadooh u snem 2013 ha Namdong.

Ka Thadlaskein C&RD Block man ko kawi na ki Block kawa heh dooh napyrdi ki 5 tylli ki C&RD Block ha Ri-loom Jaiñtia nadooh i boon ki chnong, i boon bru wa i heh i thaw, ka Thadlaskein C&RD Block em ko hadooh 1,36,835 ngut kiwa chong chnong katkam ka Census 2011 wa i heh i thaw man ko hadooh 896.60 Sq.Km wei da em ki chnong hadooh 137 tylli kamtæ da em hok wow pynkha sa kawi ka C&RD Block ha Namdong.

Ka Thadlaskein C&RD hawa nujor wa kiwi ki Block ha Ri-loom Jaiñtia da heh ko hadooh ar le chah, kam ka nongmuna ka Amlarem Civil Sub-Division kawa em du 398.00 Sq.Km i heh wei i boon bru wa 43,552 ngut, ki chnong won da em 95 tylli. Ka Laskein C&RD Block toh kawa heh 390.40 Sq.Km, i boon bru 89,965 ngut wa ki chnong 87 tylli, kamtæ ka sorkar MDA toh u pynyoh nyngkong ko ya ka Namdong C&RD Block.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

Da kyntu u leh ya ka sorkar MDA lyngba ka Health Department wow pynku kyrdan noh ya ka Namdong PHC cha ka CHC, ya ka Khanduli Sub-Centre cha ka PHC neibynta i bha i miat kiwa dooh wa rangli, neibhah ya ka Namdong PHC da dep wow chna ya ka yungkrehkaam (Building) ka CHC nadooh u snem 2012 tangwa hadooh katni da sahkut u wai ya ka wei wow pynbiang ya ki wakreh.

Da kyntu leh wow pynchna ya ki skur kiwa da sih.