U MLA ka Mowkaiaw, u Nujorki Sungoh ynne ka sngi hawa e yei pynsñiaw yong oo hajrong ka mang tangka ka sorkar jylla, da ngait skem u wa kani toh kawa daw wanrah yei bha i miat deiwa ong wa emkaam wow pykhat yei suk i lai i wan deiwa yaroh yei rai ka sorkar wow kyrriah ya ki yung krehkaam ka sorkar cha New Shillong.
Hajrong ini da ong u wa emkaam leh wow pynheh ya u sarok NH-06 khamtam nadooh ka laad Shillong Bypass hadooh ka Thadlaskein uwa da sahkut ki kari na ki por cha ki por wei da em leh hadooh 10 kynta. Kamtæ da dawa ko toh wow pynkylla 4-Lane noh ya uni u sarok ha kini ki bynta.
Da kyntu u leh ya ka sorkar wow pait cha ki thaw wa em cha palatsor yow booh kam ki People’s College yow lait ki bru wow lai cha sor wow thooh thaw puræ neibhah na kiwa lai puræ kiwa boon dooh toh kiwa dooh wa duk.
Da e nongmuna u leh ya ka Saw Lyngdoh College wa em hapoh ka Constituency u kawa da hap khang neidaw wym ye u pynlai ya ka wym dap poisa wei deiwa em kam kini ki College daw pynliwan ki ya kiwa sah cha sor wow uiñ biang ki cha chnong ki iwa daw pynkyllooid kylla ya ki thaw wa em cha sor.
Da pynkynmoo u leh yei dawa pynku kyrdan ya ka Laskein C&RD Block cha ka Sub-Division neidaw wa da man ko ka Block kawa da rim bha kawa da wai 8 bnai hadien wa yoh ya ka jylla Meghalaya heiwa neiliang ka chnong Laskein leh da e ko yei thaw wa heh 100 Acre yow booh ya ka yung krehkaam ka Block.
