Haka yaaw pynyoo rong ya ki maar rep waphær waphær nadooh ki soh, ki jhoor, ki syntu wa kiwi ki mar wa tip kam ka Horticulture Exhibition 2023-24 wa pynman da ka yung krehkaam u District Horticulture Officer, West Jaiñtia Hills District ha madan Marian Hill Higher Secondary School, Jowai haka 22 tarik, neiliang u kongsan yong kani ka sngi u Wailadmiki Shylla, MLA uwa man leh u Chairman ka Meghalaya Urban Development Authority (MUDA) da pynchlur u yaki khon khynroo khyllood wow kyruiñ ki chei kaam rep kaam riang wot hadien wa pyndep yei puræ puthi neibhah hadooh kamwa man katni ki mar baam kiwa ye u rep da i hi leh dang chkeh bait i na baar.
Heijooh i por ong u leh ma bien hi u chimkhia yei kaam rep da kiwa da em tip em stat daw ku i ye pynmih mar baam haka jylla.
Wei kamwa boon hi ki bei ki pa phah ki yaki khon wow lai skur, ym jooh pynmyllien de ki hei rep i riang, kamtæ u Wailadmiki won kyntu u wow sñiaw sarong yei kaam wa kreh wa khih ki deiwa sikai pateiñ haki khon khamtam ha kini ki sngi wa duna i yoh kreh sorkar, najrong u pynchur leh yaki khon u thooh ki yaki laad waphær waphær yow yieñ hei yong ki hi i kjat.
Pyntip haroh u wa neiliang ka sorkar em ko chiboon ki Scheme wa ye u yoh yarap wei boonsien wym yoo yei myntoi toh neidaw wym em wa pynpliah ha iwi don i kaam, i daw toh wa yabeh ki kat chawa yoh Scheme.
Kamtæ katwa duna ki warep wa wan thooh bniah heiyatoh ki laad yarap, kyntu u wow man kiwa chimkhia u li thooh bniah na ki chnat sorkar wa da booh kyrpang kam ki Veterinary, Agriculture, Horticulture wa kiwi neibhah i thmu wow booh jar jiar ki chnat toh yow ye u chakri rap bha ya ki paidbah.
Kiwi won wa e yei klam kynthup ka D.V. Lyngdoh, ADC West Jaiñtia Hills District, ka D.C. Sohtun MAS Director of Horticulture Meghalaya Shillong, u S. Rani, District Horticulture Officer, West Jaiñtia, u R. Lamare, Asst. Director of Horticulture, West Jaiñtia Hills Jowai, u Forster Kharsohnoh Progressive Farmer na West Jaiñtia Hills, u Mutshwa Thabah, Vice Chairman EARMACS wa kiwi.
Hadien ka yalang neiliang u MLA da lai pait haroh u yaki mar rep waphær waphær wa da wanrah da kiwa rep, kamjooh leh ki thaw dai wa da chimbynta da ki chnat sorkar wa yatoh wa ki kaam rep.
Neitæ ha kani ka sngi da em leh ka yalang wow pynsñiawthooh wow pynche rap bha chooh chooh cha ki warep heiyatoh i rep i riang wa da e da ka Krishi Vigan Kendra KVK West Jaiñtia Hills.
Discussion about this post