Neiliang kiwa kitkaam ka BJP-Youth Wing Meghalaya da wan ki chaphrang wow pynche hajrong i pynbaad wa ym hun ki yei krehkaam u President ka Party, u Ernest Mawrie.
Katkam ka khubor wa da phah da u State President ka BJYM, u Krison Langstang wa u Secretary, u Skelton Lyngdoh, da ong ki wa ym em kam itæ i sñiaw yaphær ha i rukom krehkaam ka Party hapoh i u yahkhmat u Mawrie wa kiwi won ki kaam namo ki Program wa da leh ka Party neibhah waroh kreh ki chirrup kam ka Party.
Da ong chooh chooh ki wa i ong u President wow mih na ka sorkar MDA lada chem ya ki kaam baam-tooh toh i rai na waroh ki chnat ka Party.
Da ong leh wa kam ka Party hapoh i yahkhmat u montri rangbahdooh ka ri, u Narendra Modi em ko ka thong wow yaleh kamjooh leh wow pyndooh ya ki kaam baam-tooh hapoh ka ri (Corruption Free) wei kam ki khynroo em ki leh ka jooh ka thong wei kyrchaan ki leh ya u Mawrie hajrong ini.
