Shillong: Ka Congress kawa em ha i liang pyrchah hapoh ka jylla Meghalaya, ynne ka sngi da e ko yei kyrchaan ya i yakhih ki warep hapoh ka ri India, deiwa pynman ya ka yakhih deiwa rah Placard wei kamjooh wow kbai yei dawa wow bichaar biang ya ki 3 tylli ki aiñ warep.
Kam wow kdaw heini wa ki warep na waroh kawi ka ri India da pynman ki ya ka yakhih kattu la 13 sngi yow pyrchah ya 3 tylli ki aiñ wa da wanrah da ka sorkar pyrdi, kitæ ka Farmers’ Produce Trade and Commerce (Promotion and Facilitation) Act, 2020, ka Farmers (Empowerment and Protection) Agreement of Price Assurance, Farm Services Act, 2020, wa ka Essential Commodities (Amendment) Act, 2020. Yow pynjoor ya i yakhih, ka kynhun yong ki seiñ ki warep da khut ki wow pynman syndon da ka khang chnong ha waroh kawi ka ri India nadooh i por 11 waje i step hadooh i por 3 waje noh chariñ ka sngi.
Hawa klam ha kani ka sngi, kawa yahkhmat ka Congress ha kani ka jylla kawa man leh ka MLA yong ka East Shillong, ka Dr. M Ampareen Lyngdoh, da ong ko wa ka sorkar Meghalaya Democratic Alliance (MDA) hapoh ka jylla da pynbna ko ya ka sngi kyrpang ki warep dang ha kini ki sngi wa da dep, tangwa hadooh kattæ ym pu em wanrah won ya ki aiñ wow yada ya i hok yong ki warep.
Da ong ko wa da em i pynbaad wa ka Congress ha ka jylla chim kabu ko na kani ka phang, neibhah du ki warep ha Haryana wa Punjab kiwa yakhih wow phah bichaar biang ya ki 3 tylli ki aiñ. Da ong ko wa ki warep hapoh ka jylla ye u man wa ym pu sñiawthooh ki yei ktah yong kini ki aiñ, tangwa ha kawi ka sngi ki warep na ka jylla leh daw sñiawthooh ki iyi i daw wa emkaam wow pyrchah ya kitai ki le tylli ki aiñ.
Ka Dr. Ampareen da kynthah ko leh yei klam u Montri Rangbah, u Conrad K Sangma wa kitai ki 3 tylli ki aiñ ki warep wei ym ktah ya ki warep ha ka jylla, deiwa ong ko a ki warep ha ka jylla ki chah ksih dor ki ha ki dalal hawa pynpoi ki ya ki mar rep cha ki yaw ki haat, kamtæ ka jylla Meghalaya ka emkaam smat ko wow wanrah ya ka aiñ yong i hi wa kynthup ya ka Minimum Support Price.
