Shillong: Ka Hynniewtrep Youth Council (HYC), da pynsñiaw ko yei kyrchaan yei pyrchah luti rel ka KSU, wei da dawa ko na ka sorkar wow dam noh ki chi syndon yei chna ya ka luti rel wei wow khut yaklam ko ya waroh ki seiñbhalang wei wow dam noh u kdong ya ki dkhot ki seiñbhalang du wa suba wa emkti ki ha kani ka kaam.
U General Secretary ka HYC, u Robertjune Kharjahrin, da ong u wa ka seiñ ka kwah ko wow pyntip cha ka sorkar wa ka ymtoh u pynkrehkaam ko ya ka luti rel katwa ympu ye ko u pynkrehkaam ya ki laad wow pait bniah yei psiah i mih ki baarjylla chapoh ka jylla.
Da ong u leh wa ka laad wa baing dooh wow leh yeini toh da ka Inner Line Permit (ILP), ymtoh da ka Facilitation Centre namo ki Exit wa Entry point. Da ong u leh wa ka ILP ka bichaar chwa ko ya u bru chwa wow psiah u cha ka jylla wei lada ym ye u pynsakhiat yeiwa thmu u ymye u psiah, katwa ka Facilitation Centre ka e laad chwa ko wow psiah cha ka jylla yow bichaar ya ki kot ki sla yong ki bru.
Chooh chooh da ong u wa du na ki kari sarok leh i wan tooid ki baar jylla da joor bha ko wei lada wan saka luti rel daw joor chooh chooh i.
“Lada ka sorkar ym kwah ko u khut yaklam ya ka KSU neidaw ki kaam wa leh ko iyi i daw won ym khut ko ya kiwi ki seiñ ki wym em kti ha ini wei kiwa dang pyrchah ki dei jai jai,” da ong u Robertjune.
Da ong u leh wa ka sorkar heipor wa khut yaklam ko wa ki seiñ kieñsuloi ym jooh phah sangeh chwa yei kaam wa leh ki wei da yaklam wei da ya soi wow sangeh ya ka yasiat. Lada ka sorkar ye ko u leh ya ini wa kam kini ki jait seiñ i yi eh ko wow khut yaklam wa ki seiñbhalang.
Katkam i ong ong u Robertjune i wanrah ya ka luti rel toh i lehbor u Montri Rangbah khlem ap u yei sur ki paidbah wei da leh u yeini deiwa pyrkhat u du wow yoh vote u.
Da dawa na ka sorkar wow hukum ko ya ki pulit wow sangeh noh u kdong ya ki dkhot ki seiñbhalang wei wow pyndik ya kiwa hayung yong ki.
Discussion about this post