Ka Kur Sari Mukhla Umlangshor da rai ko wow kyrchaan pura ya u para kur ki, u Bitos Sari uwa man u kyrtong ka Congress uwa daw yakhun ha kani ka Election MDC 2025 na 5-Mukhla Ummulong Constituency.
Ha ka yalang wa da pynman ha Mukhla Umlangshor deiwa emlang ki heh ka kur deilang ki dkhot ka kur, neiliang u Myntri Lyngdoh uwa man kam u Secretary ka chnong Umlangshor, da ong u wa lada ka kur Sari em ki yei yatylli, ki won kam kha ki man, kam kiwa chong chnong smat ki wow kyrchaan wow ya emlang wei wow e yei yarap.
Da ong u leh wa mar ya pyntip u Bitos cha oo wa daw yaleh MDC u, oo leh dap u dei kmen neibhah wym jooh em u dap chynrang næ dap kynthai ka chnong wa nood u mih wow yaleh Election wei kam u lok wa yajan leh smat u wow e yei kyrchaan wei ka kur Sari man ko leh kawa embhah tam.
Kamtæ da kitbok kitrwiang u ya u Bitos wow yoh u yei chait i nang yow yoh yei jop.
Neiliang u Radi Sari uwa man kam u Waheh Kur Sari da ong u wa kam ka kur ka jait leh pdiang ko yei yaleh Election u Bitos wei da e ki leh yei kyrchaan wei daw lai luti wow thooh chooh chooh ya kiwi ki wow e yei kyrchaan deiwa chna ki Unit ha kiwi ki chnong yow ya sneiñ para chi boo chi kong wei u yaleh katwa ye hanla ym em ya ka spah ka phaw wei u yaleh dei burom ksiar.
Kamtæ da khut u yei man yatylli wei wow ya krehlang yow pynjop ya u Bitos yow poi cha ka thong.
U Bitos Sari hawa e yei klam da ong u wa kani ka yieñ yaleh Election u ymtoh deiwa em wa pynbor oo næ kiwa thong poisa wei ka yurim u toh wa lada jop la rem leh, ya ka Constituency, ka kur ka jait, ka chnong ka thaw toh yow chakri kamjooh ya ki paidbah ymtoh wow jop ya oo samen.
Da e khublei u ya ka kur yei e mynsien ki ya oo hei lai luti u wow thooh ki laad kiwa miat wa bha u pynroi ya ka yung ka sem, ka chnong ka thaw, ka kur ka jait wa ya waroh kawi ka Constituency.
Da u ong leh wa lada katwa jia leh, ini i yatylli da man ko kamwa da jop hi.
Discussion about this post