Ka Meghalaya State Pollution Control Board (MSPCB) ynnin ka sngi da pynman ko ya ka Public Hearing heiyatoh wa i thmu wow pynheh ya ka Shillong Airport heiwa ki paidbah wa boon da kyrchaan ki yeini.
Ki waheh na ki chnong da kyrchaan ki yeini deiwa pynsñiaw leh yei thmu wow yoh kreh ki tre chnong.
U Director ka Shillong Airport, u Rajeev Ranjan da ong u wa deini i pynheh daw ye ki lieñsuiñ A320 wow hiar heini neibhah daw pynheh wei pynjrong ya ka Runway na ka 1,829 meter cha ka 2,400 meter iwa man sa 571 meter u pynjrong ya ka.
Ka Terminal Building u pynheh ya ka na ka 5,000 sqm cha ka 10,500 sqm hadien wa thied thaw ka sorkar heiwa daw chimpor ko 18 bnai wow pyndep, iwa mut hadooh u 2027.
Neiliang kiwa pynlai ya ka Airport da kular ki wa kiwa daw yoh kreh u man ki da ki tre chnong kiwa wan na ki chnong wa em chajan yow leh ya ki kreh Semi-Skilled wa Unskilled wei ya ki jait kreh wa emkaam ka puræ puthi daw jied katkam wa biang kyrdan wei daw yaleh wow jied ya ki tre chnong.
Kamwa man kattæ 70-80% kiwa kreh hapoh ka Airport toh ki tre chnong wei manda dep u chna pynheh ka daw ku ki bru wa wan nadooh 1.5 million chi snem hadooh 5–6 million, wei kiwa kreh leh daw ku ki da le-soo chah.
Kam wow kdaw heini, u Chief Minister, u Conrad K. Sangma da pyntip u wa ya i pynheh ya ka Shillong Airport ha Umroi u pyndep ha u 2027 heiwa ki Airlines kam ka IndiGo, SpiceJet, Air India wa kiwi kiwa pynemkaam ya ka Airbus 320 wa kiwi kiwa heh kam kini daw ye ki wow hiar ha Shillong.
Hadien wa pynheh ya ka daw ye leh u pynyieñ (Parking) ya ki lieñsuiñ hadooh san tylli ki Airbus A320 chisien pynyieñ neiwa soo tylli ki lieñsuiñ khian katkam wa man katni.
Discussion about this post