Ki tre yong ki Petrol Pump hapoh ka Meghalaya Petroleum Dealers Association (MPDA) da pynsñiaw ki wa jooh em sakhiat i leh buit tooh wei sai tooh yei phñiang kari ha ki sarokbah iwa da wanrah yei dooh nong ya ki tre Petrol Pump.
U President ka Association, u Kennedy Khyriem hawa pynsñiaw yeini, da ong u wa ymtoh waroh kiwa yah Tanker kiwa emkti wow tooh Petrol, tangwa da ong wa em ki kattu katni kiwa yah Tanker kiwa emkti ha ini i kaam tooh deiwa lai psiah cha ki thaw wa da kær da ka Tin yow sai tooh yei Petrol.
Da ong u wa na kawi ka Tanker kawa chniam kamwa 20,000 liter i phñiang dang wiar hadooh kamwa 200 liter, wei ki Tanker kiwa niam 12,000 liter i phniang dang wiar hapoh 100 liter.
Da ong u leh wa em ki thaw wa da khleh da kiwi won ki kynja um ha ka Petrol, wei ini da wanrah ko yei dooh wa khroo ya ki Petrol Pump.
Chooh chooh da ong u wa ini i tooh yei phñiang toh kawa da jia da boon snem kattu, wei hajrong ini i em kini kiwa tooh Petrol, ki pulit ha ka 24 tarik uni u bnai da pynman ki yei kynreh ha ki 7 tylli ki thaw wa em i tooh wa i khleh ya ka Petrol ha Ri-Bhoi heiwa da rah leh ya kattu katni ngut ki bru wei da kem leh ya ki tiar wa kini kiwa tooh da pynemkaam ki.
U Kennedy da ong u wa ka Association ka e ko yei ya krehlang waka sorkar Meghalaya kamjooh waka chnat pulit kawa da khyndang ya kiwa tooh Petrol ha sarok, heiwa da ong chooh chooh wa ki thaw wa leh ya ki kaam tooh phñiang toh kiwa man pyrchah ya ka aiñ neibhah katkam ka aiñ ya ka Petrol ym ye wow booh kat cha wa em neidaw wa ye ko wow kem diñ wei daw mih i mynsoo.
Discussion about this post