Kyrchaan pura ka EJHTOTA yei booh Deadline ki seiñ na East Jaiñtia yow pynchna noh ya u NH-6

Ka East Jaiñtia Hills Truck Owner & Transporter Association (EJHTOTA), ha ka kyrwoh wa da phah da u President yong ka, u Kyrshan Dkhar da pyntip wa neiliang seiñ da e ko yei kyrchaan wa pura ya ka Synjuk Waheh Shnong East Jaintia Hills District, ya ka Khasi Students’ Union-Narpuh Circle wa yaka Jaintia Students’ Movement-Eastern Region hajrong booh por (Deadline) yong ki ya ka sorkar hei wow chna pynmiat noh wut-wut ya u sarok National Highway-6 uwa da sih sakhiat hadooh wa da palatpood katkam wa man kattæ.

“U sarok NH-6 toh u thied snaam yong i kiwa chong chnong yong ka jylla Meghalaya wei kamjooh leh yong kiwi tawon ki jylla ha ka thaaiñ chaneiñ mihsngi yong ka ri India. I sih chawa palat yong uni u sarok katkam wa man kattæ toh nadooh Soomer, West Jaiñtia Hills hadooh Malidor, East Jaiñtia Hills iwa nang joor kat nang mih ki sngi, wei ini ym du wa ktah ko yei lai i wan yong ki paidbah, tangwa iwa maa chooh chooh toh ya ki kari mator wa lai wa wan, khamtam ya i mynsien wa kordor yong ki bru,” da ong u Kyrchan Dkhar, President, ka EJHTOTA.

“U sarok hei naam toh u National Highway, tangwa hei kaam won tang kam u sarok pohchnong leh ymtoh de. Kat hadooh ynne ka sngi u paidbah sah u hei doom hei langoh nei wym tip wa neiyi sang i daw wa da ieh beiñ sakhiat ki bor wa toh u pait ya uni u sarok kat hadooh deini hadooh wa da ktah joor bha ko yei lai i wan yong ki kari mator tymbud yong uni u sarok. Hei pait yong i yoo lakam wym su dan sarok ki paidbah wa em kari mator,” pynrap u Kyrchan Dkhar.

“Ya katkam wa man kattæ ki paidbah wa lai wa wan lyngba yong uni u sarok da chrai bha ki. Katwa kamtæ neibynta i bha i miat yong u paidbah waroh, ka seiñ EJHTOTA dawa joor ko na ki bor sorkar nadooh ka sorkar jylla hadooh ka sorkar India wow chna pynbha noh ya uni u sarok wut-wut uwa man u budloom yong kiwa boon ki jylla ka thaaiñ khamtam ya ka jylla Meghalaya, wei heiyatoh wa ini, ka seiñ e ko ya i kyrchaan wa pura ya ki seiñ kiwa da lai chwa chakhmat nadooh ka SWS East Jaintia Hills District, ka KSU-Narpuh Circle waka JSM-Eastern Region hajrong i e por (Dealine) yong ki ya ki bor sorkar wa toh sap u pait wow chna pynbha noh wut-wut ya uni u sarok,” pynkut u kyrwoh na ka EJHTO&TA.