Shillong: U President ka UDP, u Dr. Donkupar Roy da ong u wa ka sorkar em ko ka laad neibynta wow pynbait yei eh i khoo wa mih na i yakhih ki seiñbhalang hajrong ka luti rel.
“Emkaam wow ya phyllu yumut iwa bniah bha hajrong ini chwa wa ka sorkar u chim ko ya ka rai wow lai chakhmat”, da ong u Dr. Donkupar hawa kylli kiwa pathai khubor yei sñiaw yong oo hajrong kani ka kaam.
Da ong u leh wa ka sorkar em ko ka laad wow pynbait wa kiwa pyrchah ya ka luti rel lada kwah ko neibhah i ya pynyoo bor ympoi i katchawa em.
U President ka UDP da ong u leh wa chwa wow sdang ya ka luti rel emkaam wow ya phyllu yumut wei wow yapyrkhat chwa deiwa yaklam wa kiwa ya pyrchah ya kani ka luti rel.
Ha i jooh i por da pynsñiaw u wa oo ym em u pyrchah u ya ka luti rel tangwa emkaam ya ki laad ki luti wow sonteri ya i wan ki baar jylla.
Da ong u leh wa ini i mynthi ka sorkar ya ki seiñbhalang wa kynthup ya ka FKJGP, HNYF, RBYF wa ka CoRP, kiwa kyrchaan yei yakhih ka KSU wei da maham ki leh wow yakhih hei yatoh wa ini emkaam u yaklaam wa ki.
Discussion about this post