Shillong: U Chief Executive Member (CEM) ka KHADC, u HS Shylla da e khublei u ya u CEM ka JHADC u Madonbai Rymbai hajrong wa kyrchaan u ya ka Khasi Hills Autonomous District (Khasi Social Custom of Lineage) (Second Amendment), Bill 2018, wei yei pynsñiaw u wa em i thmu wow wanrah ya kam kani ka jooh ka Bill ha JHADC.
Hajrong i kwah u wow kynthup lang ya waroh ki Khynriam, ki Pnar, ki Bhoi, ki War ki Maram, neiliang u Shylla da ong u wa da dep leh ya ini ha ka Principal Act, 1997.
“De em lut waroh nadooh ki Khynriam, ki Pnar wa kiwi iwa mut wa toh ki Khasi waroh,” da ong u Shylla.
“I pdiang sñiawbha i leh yei e yumut u CEM ka JHADC wow kynthup lang ya ki chynrang Khasi kiwa yoh kurim da ki wym toh ki Khasi ha kani ka aiñ, wei ym toh iwa eh u leh ya ini,” ong u CEM ka KHADC.
U Shylla da ong u wa i pyndooh noh ya i man Khasi toh nadooh u snem ha ka Principal Act yong u snem 1997, ha ka Section 10 wei kiwa thap thymme ha kani ka aiñ toh wow pyndooh noh yei man bru-loom kiwa yoh kurim wa kiwa ym toh ki Khasi.
“Ha kitu ki por ym em kiwon kiwon kiwa pyrchah wei i pyrchah wa katni toh kawa ym em yurim neibhah i pyndooh yei man Khasi ya ki kynthai wa yoh kurim wa kiwa ymtoh ki jaitbru toh kawa da em chwa,” da ong u CEM.
Discussion about this post