U MLA wa nyngkong dooh ka Mawlai uwa da mihkhmat hadooh san sien khlem rem, u S.D. Khongwir da pynsñiaw u wow kyrchaan ya u MDC uwa man kam u kyrtong ka National People’s Party (NPP) ha kani ka Election 2023, u Teiborlang Pathaw.
Kam i dak wow lehburom ya uni u waheh ka chnong Mawlai, neiliang u Teibor Pathaw ryngkat wa kiwa kyrchaan ya oo da lai yachem ki ya u S.D. Khongwir ha yung u iwa em ha Mawlai Nonglum, heiwa da yasyllok leh neibynta ki kaam wa yatoh wa ka Election.
U MLA warim ka Mawlai da ong u wa i kyrchaan ya u Teibor toh neidaw wym chaniah u ya u Process T. Sawkmie, u kyrtong ka UDP, hanla u Khongwir da pynsñiaw u wa dang noh i mynsien u cha ka UDP hadooh katni.
Da ong wa i man i long u Process da pynman i ya oo wow dam u e kyrchaan, wei hawa ym em da uwi tawon hap kyrchaan noh u ya uwi uwa yakhun bha katni u Teibor Pathaw.
Chooh chooh da ong u wa u Process ha ka sien wa nyngkong dooh wa jop u da ong u wa jop u dei yong oo hi khlem em wa yarap na kiwon kiwon.
