Kawa yahkhmat yong ka Congress Legislature Party (CLP), ka Dr. M Ampareen Lyngdoh da ong ko wa u bha lada ka sorkar e laad chwa ko wow bichaar lang ya ka bui (Report) ki Regional Committee ha kawa da pynbait ya u pood u ang, hachwa wow ekti næ lai pynsñiaw cha ka sorkar India. Heiwa da ong ko wa leh wa Party kawa em ar ngut ki MLA kiwa toh ki dkhot hapoh ki Regional Committee, da kyrmen ko wa ka Meghalaya daw yoh nong ko na ini i pynbait ya u pood u ang.
Da ong ko wa u man i iwa bha wa ka sorkar India ka smat ko wow ap yeiwa ong ki ar jylla, heithaw wow ekti bait cha kiwi won ki chnat, da e yaroh ko leh ya ki Regional Committee kiwa da kreh chitom wow pynkhreh ya ki Report deiwa thooh yei sakhiat ha ki thaw khappood wa ya kajia.
Hajrong i wym ye wow pynbait ya u pood u ang nadooh ki por wa nachwa, ka Dr. Ampareen da ong ko wa katni ka synchaar khadar da kylla bha ko, neibhah katni kiwa yahkhmat toh kiwa da stat da tip wei ki wym kohngooh ya iyi wym yahaap, wei katni lyngba ki Regional Committee wa em du da kiwa mihkhmat ka jylla wei da ye ki wow pynbiang ya ki Report, ym du deiwa chaniah ha ka Survey of India næ ki sahep na Delhi kamwa da leh ha ki snem wa da dep, wei neiliang kiwa yahkhmat ka Congress da e ki leh yei yaroh ya ka sorkar hajrong ini i bynta.
Ha i jooh i por ka Dr. Ampareen da ong ko wa katni da mih sa du iwi i yu kylli; lada ki ar ngut ki Montri Rangbah ka Meghalaya wa Assam u kohngooh namo ym kohngooh ki yei chem yong ki Regional Committee, deiwa ong leh wa ya katni hap wow chaniah ya iyi wa da dep wow pynbait, wei lada lai sakhiat katkam i chem yong ki Regional Committee ka jylla Meghalaya daw yoh nong.
