Shillong: U Montri Rangbah ka jylla, u Conrad K Sangma da ong u wa ka sorkar da yaklam ko waka sorkar India wei kamjooh wa waroh ki kynhun hawa yatoh wa i khai im biang ka phang i kajia ha Ichamati lyngba ki pynbaad da ki kynhun waphær waphær, heiwa da ong u leh wa ym em iwon iwon i kulmar næ sñiawthooh bakla hajrong ki pynbaad kiwa da mih na ki kynhun wa kynthup na kani ka jylla wa kiwa na baar ka jylla.
Da ong wa ini i phang toh iwa chit bha ha ki bnai wa da dep, tangwa ym em de katni wei lada em iwon iwon i sñiawthooh bakla na ki pynbaad da ki kynhun, ka sorkar daw pynbait deiwa yaklam ya waroh arliang.
U Conrad da ong u wa ka sorkar da lai ko chakhmat wow pyntikna wa kam kini ki pynbaad ym em yurim wei kiwa ye u pynbait smat, deiwa pynrap chooh chooh wa ha i yoo yong oo da yaklam sñiawthooh yow ye u pynbait ya kiyi kiyi waroh.
Hawa yatoh wa i wah yong ka Khasi Students’ Union da ki Banner kiwa pyrchah yei wan luchia yong ki kattu katni ngut ki jaitbru Bengali, u Montri Rangbah da ong u wa ka sorkar da paitbniah bha ko ya i jia waroh wei da pyrchang leh wow yaklam wa ka seiñ khnang yow ye u pynbait ya kiwon kiwon ki sñiawphær.
Neiliang u Montri Kaam Pohyung ka jylla, u Lahkmen Rymbui da ong u wa ka sorkar da pait bha ko ya i jia waroh khnang wow lait na i jia wa ye u ktah ya i suk ka saiñ, deiwa ong wa kamwa man kattæ, ym em iwon iwon i jia ha Ichamati wa kiwa chong chnong na ki jaitbru waphær waphær chong suk ki.
Hawa kylli, da ong u wa ka sorkar daw pyntikna ko wa i suk i saiñ u em i leh ha kani ka leh niam Durga Puja, deiwa burom ya waroh i ngait niam wei toh ka kamram yong ka sorkar wow pynneh ya i chong suk ha ka jylla.
