U Montri Rangbah ka jylla, u Conrad K. Sangma ynne ha ka yung dorbar chna aiñ ka jylla da ong u wa i soi ya ka soskular MoU hajrong ki 12 tylli ki thaw wa kajia daw yaklam ya ki ha nongbah New Delhi hapoh uni u bnai heiwa ka chnat ki kaam pohyung ka ri, da booh ko ya ka 27 tarik uni u bnai wow pyndep ya ini i kaam.
U Conrad da pyntip u leh wa neiliang ki Montri ka sorkar daw synraan lang ki ya oo ha kani ka sngi heiwa daw pynbait khaddooh neibynta ki 6 tylli ki thaw chwa.
Da pynsñiaw u leh yei mynsien wa kmen wa ka jylla da dap ko 50 snem kattu deiwa pynsñiaw leh wa ki paidbah ha khappood ym chitom de ki neibhah wa ka sorkar da leh ko yeiwa emkaam dooh katni khnang wow lait ki bru ka thaaiñ khappood u chitom.
Hajrong ka Them Metor da kyrmen skem u wa ya ini i kaam daw ye u pynbait smat noh, deiwa kyntait leh u klam chiboon hajrong ini i kaam neibhah wa dang em i hapyrdi i chong bichaar ka High Court tangwa ha kini ki tayaw ki bnai wow wan daw ye u leh ya ki bynta wa emkaam iwa da chem chitom ka sorkar ha u snem wa nyngkong yong ka hawa jia ini.
Iwi i bynta won wa pynche u Conrad ynne ka sngi toh hajrong i klam yasuk wa ka seiñ HNLC heiwa da pynsñiaw u yei mynsien wa kmen wa bien kani ka seiñ u wan chaphrang wow klam yasuk wei wow ye noh u pynkut ya ini i kaam chisien don katkam ka riti synchaar ka ri heiwa da dep leh wow jied ya u ksiang.
