U montri ka chnat kaam pohyung ka jylla uwa man leh u MLA ka Amlarem, u Lahkmen Rymbui hawa yaklam wa kiwa pathai khubor ynne ka sngi da kyrmen u wa hapoh u snem 2022 u pyndep wow chna pynheh ya u sarok nadooh Yingkieñ Myntdu (Treiongriang) hadooh laad Muphlang yong u sarokbah NH-40(E).
Da ong u wa ya uni u sarok daw chna dei yarap poisa ka sorkar pyrdi hadooh kamwa T. 42 klur wei wa da khut ya ka Tender nadooh u Naiynñiaw uni u snem wei neidaw wa thap pyrtuid du le ngut heiwa na kini da em ar ngut kiwa chah kyntait (Disqualify) katwa kamtæ da khut Tender biang sa chisien heiwa katkam wa tip u da wan thap hadooh kamwa 14-15 ngut dei kyrmen skem leh wa hapoh u 2022 u pyndep yei kreh waroh.
Heiyatoh wa u sarok won nadooh na Treiongriang cha Khliehtyrchi, neiliang u Lahkmen da pyntip u wa i kreh ha uni u sarok dang em i hapyrdi i yaklam.
Da pyntip u leh wa heiyatoh wa uni u sarok thymme da em i bynta iwa haap chim thaw na ka chnat Forest Department iwa heh kamwa 4,000-5,000 sq feet wei hap su salan ya i thaw wa chim na kani ka chnat wei emkaam leh wow bood ya ki kyndon ka aiñ Forest Conservation Act.
