Kyrpaad ka 6 Shnong Wah Lukha Association na u DC wow pynsmat u sdang yaki kaam pynim biang yaka wah

Ka wah Lukha kawa da kylla rong suiñbneiñ (Blue) biang ha ka 24 tarik uni u bnai heiwa da em chiboon ki dakha wa yap ha kani ka wah.

Neiliang ka 6 Shnong Wah Lukha Association da kyrpaad ko ya u Deputy Commissioner ka East Jaiñtia Hills District wow pynsmat noh yaka kaam wow pynim biang (Rejuvenation Project) ya kani ka wah kamwa da dep kular wei halor ka rai wa da chim daka yalang wa da dep man haka 23-12-2019 da ka District Mineral Fund Trust Committee kawa da rai wow e T. 1 klur cha ka bynta wa nyngkong lane ka First Phase yong kani ka Project.

Ka Association da ong ko ha-o da tip wa yaka Tender wow leh ya kani ka kaam da dep pynbna tangwa hadooh katni ym pu em sdang. Kamtæ neiliang ka Association da kyrpaad joor ko ya u DC wow leh wut wut noh ya kani ka kaam khnang wa kani ka wah u im biang ko kam ha ki por wa nachwa wa ki dakha ki dohum leh u im biang ki ha kani ka wah.

Hajrong ini i bynta, neiliang ka Association daw yachem ko ya u DC ha kini ki tayaw wow wan khnang wow tipbniah chaphang kani ka kaam.