Ynne ka sngi ka Synjuk Ki Waheh Chnong Ri Jaiñtia (SWCRJ) da lai synraan ko ya ki paidbah ka chnong Lapangap hei wow ah kba na pynthor hapoh i yahkhmat u President, u A. Lypon, u Vice President, u Damien War wa kiwi kiwi.
Hawa yaklam wa u Damien da ong u wa dap ka synjuk deiwa sñiawsih wa khroo heiwa hadien i jinjar wa joor wa maad ki paidbah da yoh ki wow lai ah ya u kba na Pynthor Lapangap heiwa neiliang ka synjuk wa ki seiñbhalang ym em chong kli-kti ki heiwa da lai yaklam wa ka sorkar hadooh wa poi ynne ka sngi.
Da e khublei u ya u Blai wa da wai luti wow yoh u sdang biang u ah ya u kba ynne ka sngi heiwa da mih ki paidbah ka Shiliang Myntang wa na Ri-loom Jaiñtia wa Khasi wow wan yarap u ah u pynlang ya u kba.
U Damien da kyrpaad u ya kiwa boon wow mih yonglang ki wow wan yarap ah ya u kba wa dang sah boon ha kylleiñ talawiar kani ka Pynthor.
Chooh chooh da kyrpaad u ya ka sorkar Meghalaya wa kamwa man katni kini ki hali ka Pynthor wa ki loom kiwa man ki yong ka Lapangap ymhoi wow dooh ya ki.
Da kyrpaad u leh ya ka sorkar wow pynbait noh ya u pood khnang wa kini ki thaw ym hoi u dooh ya ki khnang wow yoh ki Lapangap u pynemkaam ya ki mynried kamwa da man ha ki snem wa dadep.
Discussion about this post