Kyruiñ ka JHADC cha ki karkhana khyndaw-bilat khnang wow ye u pynmih poisa

Jowai: Ka JHADC katkam wa man katni da em ko hapyrdi i chitom poisa wa joor heiwa wot ya ka tulop ya ki wakreh leh ymye de ko u su khamtam neidaw wa da hiar i yoh poisa ko na ka sorkar jylla neidaw wa da khang yei tih mooyong.

Ynne ka sngi, ka Council kam chibynta wow thooh laad kammon wow pynmih poisa da khut noh ko da ka yalang wa kyrpang wa ki heh yong ki karkhana pynmih khyndaw-bilat wa em ha East Jaiñtia Hills District.

Ha kani ka yalang da emlang u Dy. CEM ka Council u Lasky Rymbai uwa pait ya ka chnat Forest wa kiwi kiwi, wa u EM wa pait ya ka chnat Trade, u Winning G Sungoh wa ki sahep ki chnat ka Council kamjooh leh ki heh yong kini ki karkhana.

Hadien ka yalang, hawa yaklam wa u Sungoh da pyntip u wa ha ka yalang da phah ya ki karkhana wow su ki ya ka Professional Tax neibynta ki wakreh ha ki neibhah ki wakreh hapoh kini ki thaw man ki kiwa boon bha wei wow pyndep ki wow su hapoh ka 30 tarik uni u bnai.

Related posts

Lada ka sorkar sñiaw ko wa emkaam palat ko wow wanrah luti rel ye ko wow lai chakhmat: Ardent

May 12, 2025

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Chooh chooh da pyntip u wa da phah leh ya ki wow su ki ya ka Non-Tribal Service License neibhah boon ki wakreh toh kiwa da wanrah na baar jylla wei neiliang ka Council leh daw phah bru ko na ka chnat Enforcement wow lai pait lada ym leh ki katkam wa da phah.

Wei kini ki Licence toh neibynta uwi pa uwi u wakreh uwa na baar jylla.

U Sungoh da pyntip u wa da phah ya ki wow su ki ya ka Trading License neibhah kini ki karkhana pynemkaam ki ya ki kor wa heh kam ki pooh-chiloom, ki Truck wa kiwi kiwi wei da phah ya ki wow e ki ya ka bui namo ka report heiyatoh wa ki kari wa pynemkaam ki wei wow su ki yaka Trading License.

Heijooh i por da ong u wa da hukum ya ki karkhana wow thung kreh ki da ki tre jylla khamtam ha ki kaam Unskilled Labour wei lada em ki kaam kiwa ye ki tre jylla u kreh, wow thung ki pyn da ki tre jylla ha ki kaam Skilled Labour.

Neiliang u Rymbai da pyntip u wa da phah ya ki karkhana pynmih khyndaw-bilat wow pynthymme namo Renew ki ya ka NOC man la u snem deiwa kdaw ya ka hukum ka District Council Affairs wa pynmih ha ka 31 Wisu 2012.

Kani ka hukum ong ko wa ki karkhana pynmih khyndaw-bilat toh u pynthymme ki ya ka NOC man la u snem deiwa pynrap leh wa lada ym pynthymme ki ya ka, neiliang ka Council ymye de ko wow e ya ka Trading License cha ki.

U Rymbai da ong u leh wa em boon ki thaw kiwa ka Council ye ko wow pynmih poisa wei daw chong pyrkhat ki leh chirup wa u CEM hajrong kini.