La 1,190 ngut kiwa sikai Contract LP wa UP da dep pyndam ka sorkar

Ka phang yaklam hapoh ka Yung Dorbar ynne ka sngi da poi biang ko neibynta kiwa sika skur kawa wanrah da u George Lyngdoh, MLA ka Umroi Constituency uwa da kylli hajrong kiwa sikai Contract ha ki LP wa UP School kamjooh hajrong ka Meghalaya Teachers Eligibility Test (MTET).

U Montri ka chnat puræ puthi u Lahkmen Rymbui da pyntip u wa kiwa sikai skur ha ki skur sorkar kiwa da thung kam ki wakreh Contract hadooh u Kmaichongland, 2020 da em ki 1291 ha ki Lower Primary School katwa ha ki Upper Primary da em ki 72 ngut.

Na kini kiwa da chah pyndam hadooh u Thohlakhmai (Feb), 2021 da em ki 1118 ngut ha ki Lower Primary wa 72 ngut ha ki Upper Primary.

Heiyatoh wa kiwa da ye u pyndep yaka MTET, da em ki 2900 ngut ha ki Lower Primary wa ha Upper Primary 1670 ngut wei na kini kiwa da thung kreh ha ki skur sorkar Lower Primary da em 240 ngut katwa ha ki skur sorkar Upper Primary da em 16 ngut.

Related posts

Lai ood ki MDC ka VPP ha ka sorkar wym yoh Scheme sorkar pyrdi ha ki Constituency wa em ha sor

May 13, 2025

Lada ka sorkar sñiaw ko wa emkaam palat ko wow wanrah luti rel ye ko wow lai chakhmat: Ardent

May 12, 2025

Ki kaam sikai kiwa dang lait ha ki LP School ka sorkar da em 1538 tylli katwa ha ki UP School kiwa dang lait da em 132 tylli.

U George Lyngdoh da kylli u wa hawa kiwa sikai LP School kiwa da pyndep yaka MTET da em ki 2900 ngut katwa kiwa sikai UP School kiwa pyndep da em ki 1670 ngut, iyi wow jia hawa da boon kiwa pyndep yaka MTET bar ya ki kaam wa lait.

U Lahkmen hawa e yei jubab da ong u wa em ki kyndon heiyatoh wa i kyrdan chwa wow thung kreh ha kiwon kiwon ki skur yow yoh yei tipmit yaka skur, wei ym em mut wa kiwa da pyndep yaka MTET u sikai ki du ha ki skur sorkar. Wei kini ki skur kiwa kwah wow yoh yaka yarap Grant naka sorkar wa kiwa kwah u yoh yei tipmit hap ki wow thung da kini kiwa sikai kiwa da pyndep yaka MTET.

U George da kylli won u wa ha ki LP School da dep wow thung kreh ya 240 ngut na ki 1538 tylli kiwa lait katwa ha ki UP School da dep thung kreh 16 na ki 132 tylli ki kaam wa lait, kamtæ mynnu u thung kreh ya sorkar ya kini kiwa dang sah. U Lahkmen da jubab u wa ini dang leh kattæ wei daw pyndep smat katwa ye.  

Heiyatoh won wa mynnu wow pynman biang yaka MTET Exam, u Lahkmen da ong u da mut wow pynbna noh tangwa neidaw wa em ka Election ha Assam da hap pyndam chwa wei kitu kiwa da pyndep yaka MTET Exam u im (Valid) ko 7 snem lane hadooh wa pynman biang yaka MTET Exam, kamjooh leh kitu kiwa ym em lait yaka haka sien nyngong ye ki wow yaleh biang ka lada ye ki wow pynhun yaki kyndon.