Ynne ka Indian Embassy ha Tokyo da pyntikna ko wa da em sa 4 ngut kiwa yoh ya u khñiang COVID-19 hapoh kani ka jhaad wei dang em ki hapyrdi i chah sumaar.
Wa kini ki 4 ngut, ki nong India wa da yoh ya uni u khñiang da kynjoh i cha ka 12 ngut.
Kini kiwa yoh ya u COVID-19 toh ki wakreh hapoh kani ka jhaad.
Da ong ko leh wa dang yaklam hi ko wa kiwi tawon ki nong India kiwa em hapoh ka Diamond Princess lyngba ka phone wa ki email.
Ka Embassy dang yaklam hi ko wa ka sorkar Japan wa kiwa pynlai ya ka jhaad hajrong i man i long ki nong India kiwa em hapoh ka jhaad.
Neiliang kiwi won ki ri, ka UK waka USA toh kiwa da li thooh ya ki bru yong ki kiwa hoi u mih na kani ka jhaad.
Tangwa u President ka USA da pynsñiaw u yei chrai hadien wa kit bait ya ki 14 ngut kiwa da pyntikna toh kiwa em ya uni u khñiang deiwa ym em pyntip chwa ya oo.
Ya kiwa na UK won, da em 32 ngut kiwa da kit katwa ya ki 4 ngut won kiwa da tikna wa em ki ya uni u khñiang da ieh yaki hapoh Japan.
Ya ki 32 ngut won kiwa da yoh u liwan yung daw kset (Quarantine) ki 14 sngi, kiwa da poi chnong ynnin ka sngi da em ki hapoh ka Arrowe Park Hospital wei hadooh katni ym em pynyoo ki ya i dak i chin wa yoh ki ya uni u khniang.
Neiliang ka Japan won da pyntikna ki wa kawi ka kynthai (ka nong Japan) kawa nyngkong ym em yoh ko ya u COVID-19 heipor wa test yaka wei da chah wow mih ko naka jhaad Diamond Princess deilang wa ki 23 ngut kiwa ym em da dep u Test bha ki.
Kani ka nong Japan toh kawa 60 snem i rta wei da liwan ko cha yung ko da ka Train tangwa haka 21 tarik da sdang ko wow chitom wei haka 22 tarik hadien wa Test biang yaka da chem wa em ko ya u khñiang COVID.
Ini da pynkhuslai ko yaka Japan wa boi boon kiwa da chah wow mih ki naka jhaad ye u man kiwa em ya u khñiang COVID-19 wei da chah wow mih hadooh 970 ngut (Passenger). Da pynlait ya kini wa boon u hiar kiwa wym em ki dak ki chin wa yoh ya uni u khñiang, yow yada yaki yow lait ki nei poor uni u khñiang.
Ka Japan da ong ko leh wa da kset nadooh wa sdang ya kiwa em hadooh 3000 ngut pyn hapoh ka jhaad neidaw wa ym em ki thaw sumaar wa heh hadooh wow Quarantine syndon ya 3000 ngut ki bru.
Kiwa boon kiwa dang sah hapoh kani ka jhaad toh ki wakreh yong ka.
Discussion about this post